Trane, teleurstelling ná operateur oorsese sporttoere oornag opskort

Beyneveldt sê hy het geen ander keuse gehad as om die Facebook-blad te sluit nie.

Nie net is tientalle ouers glo derduisende rande kwyt nie, hul kinders is ook platgeslaan deur die nuus dat ʼn toeroperateur oënskynlik oornag verdwyn het met die geld vir hul oorsese sporttoere.

“My kind se tas was klaar gepak,” het Elischa Fourie, wie se dogter Jenny van Blerk op ʼn hokkietoer sou gaan, gesê. “Sy moes die tas gisteraand terugsleep kamer toe. My hart het gebreek vir haar,” het dié ma van Secunda in Mpumalanga gesê.

Sy is een van talle ouers wat dieselfde stel afgetrap het met Vision Sport South Africa, ʼn maatskappy wat oorsese sport- en akademiese toere vir skoolkinders organiseer. Die meeste van hierdie kinders is tydens provinsiale toernooie gekies om aan die oorsese toere deel te neem.

Jenny moes aanstaande week op die toer na Nederland vertrek, wat ook ʼn besoek aan Frankryk en onder meer Disneyland in Parys sou insluit. Internasionale afrigters sou haar dogter, ʼn doelwagter, tydens die toer leiding gee. Hulle het boonop ʼn skarefinansieringsingsinisiatief begin om geld vir die toer te help insamel. Jenny was rasend van opgewondheid.

Gister het Fourie egter ʼn WhatsApp-boodskap van Michael Beyneveldt ontvang dat Vision Sport South Africa oornag gesluit is. In die WhatsApp-boodskap aan ouers sê Beyneveldt “dit was ʼn moeilike besluit om te maak, gegewe al die lewens wat deur die besluit geraak gaan word”.

In die boodskap sê hy ook dat hy met sy regspan sal vergader oor die proses wat nou gaan volg.

Die boodskap wat Michael Beyneveldt aan ouers gestuur het. Hy sê hy het dit gedoen omdat hy vrees vir sy lewe.

Beyneveldt het Vrydag aan Maroela Media gesê hy het die boodskap onder dwang gestuur, omdat hy gevrees het vir sy lewe. “Ek is met die dood gedreig. As ek nie gister my onderneming toegemaak het nie, sou iemand my geskiet het,” het hy gesê.

Fourie het gesê haar dogter is verpletter.

“Sy het baie gehuil gisteraand. Haar hart was bitter seer, maar geloofsgewys het ons baie hieruit geleer. Ek het besef daar is só baie mense wat in Jenny glo en vir my was dit ook ʼn geloofsproses. Die Here het ons elke keer gehelp,” het sy gesê.

Sy het haar bank gekontak om te hoor of sy enige van die geld kan terugkry, en is meegedeel dat die rekening waarin sy die geld inbetaal het, as “bedrieglik” gemerk is.

ʼn Klomp jong rugbyspelers is vroeër na bewering meestal by die Noordvaal-toernooi in Vereeniging gewerf en hulle sou op 30 November na Argentinië vertrek. ʼn Ouer van Noordwes het gesê haar seun se vertrekdatum is daarna tot 2 Desember uitgestel. Gister het sy dieselfde boodskap ontvang dat die toer daarmee heen is.

“Hy is baie teleurgesteld,” het die ma gesê.

Hulle het sowat R37 000 vir die toer opgedok. Haar dogter sou boonop saamreis en het die méér as R37 000 vir die toer uit haar eie sak betaal.

Die ma het gesê die gesin gaan nou regsadvies inwin en minstens probeer om die geld terug te kry.

Nóg ʼn ma het aan Maroela Media gesê hulle het verneem dat Beyneveldt nagenoeg twee maande lank in Japan vir die Wêreldbeker-rugbytoernooi was. Van háár kind se droom op ʼn oorsese reis is daar in dié stadium egter nie veel oor nie.

Sy het gesê haar 16-jarige seun het bitter hard gewerk om die span te haal. Dit sou boonop sy eerste keer op ʼn vliegtuig wees.

“Hierdie geld was vir ons bloedgeld en nou is dit weg. Ek glo nie ons gaan enigiets terugkry nie.

“Maar erger nog, hierdie kinders se drome is heeltemal verpletter,” het sy gesê.

Van die korrespondensie wat Vision Sport SA aan ouers gestuur het.

Stephen Claassen, wie se seun ook na Argentinië sou reis, het gesê sy kind het die nuus baie swaar verwerk. “Hy is verslae. Stukkend. Ons het saam met hom om die tafel gaan sit en dit vir hom verduidelik en die volgende oomblik was daar trane.

“Hy het vir my gesê ‘dad, ek het so hard gewerk hierdie jaar…’. Hierdie is seker die realiteit, maar ek dink nie dis die soort realiteit wat ʼn 15-jarige hoef te verwerk nie,” het Claassen gesê.

Claassen sê hulle het ook meer as R37 000 vir die toer betaal. Dit sluit egter geen ander onkoste, soos paspoorte, visums, klere en inentings in nie.

“Dit gaan nie oor die geld nie, dit gaan oor die kinders. Ek kan nie vir jou die verslaentheid op my kind se gesig beskryf nie.”

Daar is glo ook skole wat reeds deposito’s aan Vision Sport South Africa betaal het vir toere aanstaande jaar.

Vision Sport South Africa se Facebook-blad was Vrydagoggend nog aktief, maar het later nie meer gewerk nie. Beyneveldt het bevestig dat hy dit gesluit het.

“Die ouers kruisig my. Daar word nou gesê dat ek skelm is. Ek wil graag hê my maatskappy moet nog voortbestaan, maar die mense is genadeloos.”

Volgens hom het ʼn groep ouers vanoggend selfs by sy huis opgedaag en gedreig om hom dood te maak.

Hy hou voet by stuk dat die toere gekanselleer is omdat die meerderheid ouers nie betyds daarvoor betaal het nie. In een geval is 71% van die geld uitstaande en in nog ʼn geval soveel as 89% van die toergroep se geld, het hy gesê. “Ons het geen ander keuse gehad as om die toere te kanselleer nie.”

In dié stadium word vier toergroepe, ʼn sokker- en rugbytoernooi en twee hokkietoernooie deur die besluit geraak.

Een van Vision Sport SA se boodskappe aan ouers.

Beyneveldt het gesê hy het by ouers gepleit om betyds die uitstaande bedrae te vereffen.

“Ek kan nie verstaan dat mense soveel klippe gooi omdat hulle laat is met hul betalings nie. Dit is verskriklik onregverdig. Maar ons moet die kontrak afdwing,” het hy gesê.

Volgens hom het hy reeds deposito’s aan onder meer die lugdiens, hotelle en ʼn oorsese agent betaal – geld wat hý sê hy nie weer kan terugkry nie.

Beyneveldt het ook gesê daar sal nou ʼn proses gevolg word om vas te stel wat billike terugbetalings sal wees. Reëlings daaroor sal met die betrokkenes getref word, het hy gesê. Hy win intussen regsadvies in.

Hy het gesê ʼn vorige toer wat onder soortgelyke omstandighede gekanselleer is, se geld is wel terugbetaal.

Beyneveldt het ook gesê hy gaan vandag nog met ouers kommunikeer en hulle op hoogte bring van die jongste verwikkelinge.

Mark Alexander, president van SA Rugby (Saru), het by navraag gesê wat betref die rugbytoere was daar geen toestemming van Saru daarvoor nie. “Dit is ʼn skande. Hier is individue wat op ouers teer en hul vertroue skend,” het hy gesê.

Hoewel Saru geen affiliasie met enige van die toere het nie, het hy steeds opdrag gegee dat die situasie ondersoek word, het Alexander gesê.

Hy het gesê Saru waarsku ouers jaarliks teen ongemagtigde toere wat aan hul kinders aangebied word.

Alexander het ook gesê wanneer ʼn toer onder Saru se vaandel onderneem word, is daar streng bepalings waaraan voldoen moet word. Tydens súlke toere word die Suid-Afrikaanse ambassade in die betrokke land byvoorbeeld daaroor ingelig, sou enige van die toerspanlede in die buiteland hulp benodig.

“Ons stel ondersoek in. As enige van ons unies betrokke is, sal ons optree,” het hy gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

32 Kommentare

jongste oudste gewildste
SM

Dit is skreiend! Maar hy kon 2 maande in Japan toer?? Dit maak mens woedend dat ouers en kinders so ingedoen word.

Leon

En die ouers het nie betyds betaal nie. Nou wil hulle hom stenig. As jy nie bataal moet nie verwag dinge gebeur nie. Onthou dit net. Hy het gewaarsku.

Witbanker

Nou betaal die ouers se gelde terug wat wel betaal het. Met die atletiek toer is daar nie eers verblyf in europa bespreek nie.

Andrea Joubert

I’m a single parent and Witbank Primary School raised funds for my son Aiden Joubert to also go for the hockey tour and sadly last week Friday Vision Sport told us to pay the exchange rate ….and all of a sudden my son cannot go,this is unacceptable last minute disappointment as a parent we work hard for our kids future

Andrea Joubert

As j n ouer is wat op datum betaal het is dit regverdig,hoekom het hulle nie vroer kommunikasie uit gestuur oor d kanselasie van vlug