UJ-ouditorium deur brandstigters verwoes

Die Universiteit van Johannesburg (UJ) se ouditorium nadat dit in 'n brand verwoes is. Foto: Twitter via @SHEleteloMabasa

Die Universiteit van Johannesburg (UJ) se ouditorium nadat dit in ‘n brand verwoes is. Foto: Twitter via @SHEleteloMabasa

Ongeveer R100 miljoen se skade is aangerig nadat die Universiteit van Johannesburg (UJ) se ouditorium op die Aucklandpark-kampus vroeg Maandagoggend aan die brand gesteek is.

Die universiteit het Maandag in ʼn verklaring gesê brandstigters het omstreeks 02:00 by die ouditorium ingebreek om dit aan die brand te steek. Rekenaarlaboratoriums, waarin toerusting was om beroepsleiding aan studente en voornemende studente te gee, is ook in die brand verwoes.

“Die brand by die 1 000-sitplek ouditorium is uiteindelik deur die Johannesburgse brandweerdienste geblus, maar die gebou is heeltemal verwoes,” lui die verklaring. Niemand is in die brand beseer nie.

Alternatiewe reëlings moes inderhaas getref word om die eksamens wat in die rekenaarlaboratoriums en verskeie gradeplegtighede wat in die ouditorium sou plaasvind te akkommodeer. Werknemers wie se kantore ook deur die brand geraak is, is na ander kantore verplaas sodat hulle in die interim met hul werk kan voortgaan.

“Ons sal alles in ons vermoë doen om die skuldiges op te spoor, hulle te vervolg en vir so lank as moontlik tronk toe te stuur,” het prof. Ihron Rensburg, UJ se vise-kanselier, gesê. “UJ bemagtig 52 000 jong mense en hul families deur die verskaffing van onderrig en oordra van vaardighede sodat hulle ten volle aan die Suid-Afrikaanse ekonomie kan deelneem en ons sal nie ʼn minimale, gewelddadige minderheid toelaat om die infrastruktuur wat ons vir hierdie taak benodig te verwoes nie.”

Hy het gesê die universiteit se veiligheidsdienste is tans besig om saam met die polisie die beeldmateriaal van veiligheidskameras na te gaan om te probeer vasstel wie vir die brandstigting verantwoordelik was. Potensiële getuies word ook ondervra.

Rensburg het gesê dissiplinêre stappe teen 12 studente wat probeer het om met geweld die studenteraad-verkiesing in April te ontwrig, sal hierdie week gedoen word. “Ons doen ʼn beroep op die polisie, die intelligensiedienste en die regbank om hul pogings te versterk om vas te stel wie sit agter hierdie beplande aanvalle en om seker te maak dat hierdie klomp oortreders vasgetrek word.”

Alle bedrywighede by die universiteit gaan voort soos normaal.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

23 Kommentare

jongste oudste gewildste
AmY

Soos Solidariteit vroeër gesê het : hulle kan twee instansies oprig met 100 miljoen Rand.

Nico

Wat jy saai sal jy maai!
Ons huidige leiers het die voorbeeld gestel,
Nou maai hul hul eie saad! Net jammer onskuldige mense ly daaronder en opvoeding wat brood nodig is om die land te red word nadelig beinvloed

Ben Prinsloo

En nou wil die regering hê ek moet my vereenselwig met hierdie skuim en myself so verneder om op hulle vlak te kom want sou ek dit nie doen nie dan is ek n rassis.

Yol

Ongelooflik! Het die mense in hierdie land gee skaamte nie. Ek kan nie glo dat mense so iets doen en daarmee wegkom nie. Dis verskriklik hartseer!

Malva

Wye lens siening: bedoeling om alle tekens van vooruitgang te vernietig in die RSA?