Veiligheid by Brics-beraad is verseker, sê Cele

Polisieminister genl. Bheki Cele (21 Augustus 2023) (Foto: Jairus Mmutle/GCIS)

Alle veiligheidsvoorbereidings is getref vir die 15de Brics-beraad wat Dinsdag in Sandton afskop.

Genl. Bheki Cele, minister van polisie, sê hy is tevrede dat die Suid-Afrikaanse Polisiediens en ondersteunende wetstoepassingsagentskappe, wat deel vorm van die veiligheidsplan vir die Brics-beraad, alles in hul vermoë gedoen het om die veiligheid van die beraad en sy afgevaardigdes te verseker.

Meer as 40 staatshoofde, verskeie ministers en regeringsverteenwoordigers asook plaaslike en internasionale afgevaardigdes en verskeie verslaggewers sal na verwagting by die Sandton-konvensiesentrum bymekaarkom vir die drie dag lange beraad.

Cele het Maandag alle veiligheidsmagte toegespreek wat ontplooi is om die byeenkoms se veiligheid te verseker.

“As wetstoepassers van hierdie land word daar te alle tye van julle verwag om veiligheidsmaatreëls toe te pas terwyl julle as ambassadeurs van die land optree,” het hy gesê. “Dit beteken dat jy jou werk goed doen en die land goed verteenwoordig. Moenie enigiets aan die toeval oorlaat terwyl julle werk om hierdie groot geleentheid te beveilig waar 40% van die wêreld by ons kom kuier nie. Hou elkeen wat die konferensie bywoon veilig terwyl julle jul reaksie op misdaad verstewig deur polisie-ingrypings soos Operasie Shanela ter wille van Suid-Afrikaners en almal binne ons landsgrense.”

Cele sê die polisieministerie wil die land verseker dat die ontplooiing van bykomende beamptes aan die Brics-beraad nie normale polisiëring sal beïnvloed nie. “Alhoewel daar groot getalle beamptes in en rondom die venue van die beraad sal werk, sal SAPD-lede van verskeie dissiplines steeds met hul pligte voortgaan om misdaad te bekamp en te ondersoek. Operasie Shanela gaan voort soos normaalweg met hoëdigtheid-operasies vanaf Donderdag tot Maandagoggend vroeg in geïdentifiseerde hoëmisdaad-gebiede.”