Veldtog oor plaasaanvalle en onteiening verskerp

AfriForum-paneel-oor-onteiening-en-plaasaanvalle

V.l.n.r. is Ian Cameron, AfriForum se hoof van gemeenskapveiligheid, Alana Bailey, AfriForum se adjunk-uitvoerende hoof van internasionale skakeling, Kallie Kriel, uitvoerende hoof van AfriForum en Ernst Roets, AfriForum se adjunk-uitvoerende hoof van kommunikasie. Die paneel het gesê AfriForum wil hulle veldtog om internasionale gemeenskappe in te lig van die bedreiging van onteiening sonder vergoeding en plaasaanvalle verskerp. Foto: Reint Dykema.

Die burgerregte-organisasie AfriForum het gesê die inligting wat hy tans aan internasionale gemeenskappe oor die bedreiging van grondonteiening sonder vergoeding en plaasmoorde versprei, is gegrond op feite.

AfriForum het Maandag ʼn mediakonferensie in Centurion, Pretoria, gehou in reaksie op Lindiwe Sisulu, die Suid-Afrikaanse minister van internasionale betrekkinge en samewerking, en haar departement se bewerings verlede week dat die organisasie onnodig paniek in die internasionale gemeenskap saai en valse inligting versprei.

“Die Suid-Afrikaanse regering onderskat die internasionale gemeenskap se intelligensie deur voor te gee dat eiendomsreg in Suid-Afrika nie bedreig word nie,” het Kallie Kriel, uitvoerende hoof van AfriForum, gesê.

Kriel het gesê dit is ʼn onbetwisbare feit dat die ANC tydens die party se nasionale konferensie in Desember grondonteiening sonder vergoeding as partybeleid aanvaar en besluit het dat die Suid-Afrikaanse Grondwet gewysig moet word om dit moontlik te maak.

“Pres. Cyril Ramaphosa het dit by verskeie geleenthede, waaronder ʼn besoek aan koning Goodwill Zwelithini, onderstreep dat die regering grond sonder vergoeding gaan onteien. Verder hou Ramaphosa se gebruik van die woorde ‘ons mense’ om te verwys na swart mense wat voordeel uit onteiening sal geniet ernstige implikasies in deurdat wit mense nie as deel van ‘ons mense’ beskou word nie.

“Vir Sisulu om nou gemoedere te probeer kalmeer deur aan te voer dat die Suid-Afrikaanse regering volgens die Grondwet sal optree, bied geen gerusstelling nie, aangesien die ANC dan juis die Grondwet wil wysig.

“Ook pres. Ramaphosa se gerusstelling dat onwettige grondgryping nie geduld sal word nie, bied min troos as in ag geneem word dat die regering bloot van plan is om die skending van eiendomsreg te wettig,” het Kriel gesê.

Ernst Roets, adjunkhoof van AfriForum, het gesê plaasmoorde in Suid-Afrika het nou krisisafmetings aangeneem. “Volgens die jongste beskikbare polisiestatistieke is meer as 1 700 plaasmoorde en meer as 12 245 plaasaanvalle oor ʼn tydperk van 21 jaar gepleeg. Indien in ag geneem word dat daar vir drie van daardie jare geen syfers vir plaasaanvalle bestaan nie, kom dit neer op ʼn gemiddeld van 680 plaasaanvalle en 94 plaasmoorde per jaar. Dit is byna twee plaasaanvalle per dag en twee plaasmoorde per week oor ʼn tydperk van 18 jaar.”

Roets het gesê geweldsmisdaad onder alle gemeenskappe in Suid-Afrika is ʼn krisis, maar geweldsmisdade teen boere is proporsioneel aansienlik hoër. “Verskeie pogings is al aangewend om die moordkoers van Suid-Afrikaanse boere per 100 000 te bereken. Dit bes beskikbare berekenings dui daarop dat boere se kans om vermoor te word tussen drie en vier keer so hoog is as die gemiddelde Suid-Afrikaanse moordkoers, wat reeds een van die hoogste ter wêreld is.”

Verder het Roets bygevoeg dat dit onrusbarend is om te sien dat die marteling tydens plaasaanvalle toeneem, dít terwyl die polisie plaasmoorde sedert 2003 stelselmatig gedeprioritiseer het.

“In 2014 het die SA menseregtekommissie ʼn reeks aanbevelings uitgereik van stappe wat die SA regering kan doen om plaasmoorde stop te sit, waarvan die regering byna geen enkele aanbeveling uitgevoer het nie.

“Pogings om die plaasmoorde op die nasionale agenda te plaas word deur die regering as reklamefoefies afgelag terwyl die slagoffers wie se geliefdes op plase vermoor is, al selfs met geweld by die minister van polisie se kantoor uitgestamp is,” het Roets gesê.

Hy het bygevoeg die negatiewe stereotipering van wit boere, asook haatspraak waarin geweld teen wit boere verromantiseer word, word vanaf politieke platforms deur senior regeringsleiers gepleeg. “Ramaphosa, oudpres. Jacob Zuma en verskeie kabinetsministers het hulle al hieraan skuldig gemaak.”

Ian Cameron, AfriForum se hoof van gemeenskapsveiligheid, het aangedui dat die organisasie in die lig van die geweldsmisdaadkrisis besluit het om sy bestaande netwerk van 105 gemeenskapsveiligheidstrukture aansienlik te versterk en uit te brei om geweld en ander misdade te help bekamp.

Volgens Alana Bailey, AfriForum se adjunk- uitvoerende hoof vir internasionale skakeling, sal die organisasie nou sy internasionale veldtog rakende die bedreiging wat onteiening sonder vergoeding en plaasmoorde vir minderheidsgroepe in Suid-Afrika inhou, verskerp.

Die veldtog behels dat Suid-Afrikaners versoek word om hulle name te voeg by die versoekskrif wat AfriForum aan regerings en internasionale beleggers gaan stuur ter amptelike versoek om druk op die plaaslike regering te plaas om af te sien van planne om eiendomsreg te misken.

“Meer as 30 000 mense het reeds binne enkele dae hulle name by die versoekskrif gevoeg. Dié versoekskrif sal plaaslik aan die ambassades van Suid-Afrika se handelsvennote oorhandig word.

“Handelskamers en internasionale beleggers word ook gevra om druk op die SA regering toe te pas. Dit sluit ook in om die Wêreld- Ekonomiese Forum in Davos, Switserland, te besoek, sou dit nodig blyk te wees.”

Bailey het ook gesê die internasionale media sal deurlopend op die hoogte gehou word van verwikkelinge rakende plaasmoorde, eiendomsreg en ander brandpunte in Suid-Afrika. “AfriForum sal afgevaardigdes na onder meer Australië, Europa en die VSA stuur om regerings, media, meningsvormers, burgerlike organisasies asook internasionale instellings en beleggers in te lig van die situasie in die land.”

Benewens internasionale druk gaan AfriForum ook plaaslik ʼn voorlegging aan die parlementêre komitee maak wat aangewys is om die Grondwet te wysig.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

29 Kommentare

jongste oudste gewildste
White Rhino

Baie dankie!!!!

Jan

Baie dank aan julle ouens.

christa

Goed gedoen Agri. Sisulu wil mos leuens vertel en die grondvergrype en plaasmoorde verdoessel. Laat die hele wereld weet wat in SA aangaan

Werner

Ek raak baie opgewonde oor die momentum wat internasionaal begin opbou. Dankie aan Afriforum se bydrae. Dit wil my voorkom of ek in my leeftyd TWEE keer die winde van verandering gaan waarneem…

Piet

Dagsê,
Twee vrae:
1. Waar is die petusie vir handtekeninge beskikbaar;
2. Kan enige persoon teken?
Groete en sterkte met die poging.