Verkiesing: Stembrief sal vanjaar anders lyk

‘n Voorbeeld van ‘n stembrief waarop die volgorde van die partye gesien kan word. (Foto: OVK/Twitter)

Die Onafhanklike Verkiesingskommissie sê die ontwerp van vanjaar se stembrief vir die nasionale verkiesing wat op 8 Mei plaasvind, is aangepas op grond van navorsing wat die Raad vir Geesteswetenskaplike Navorsing gedoen het.

Luidens ʼn verklaring deur die OVK word die stembrief só ontwerp om die kieser te help om maklik sy voorkeurparty te kan identifiseer en voor te stem en so die kans vir bedorwe stembriewe te verminder. “Tradisioneel het die OVK altyd ʼn lukrake trekking gebruik om te bepaal watter party eerste op die stembrief verskyn met al die partye wat daarna in alfabetiese volgorde verskyn,” sê die kommissie.

Vanjaar sal dit egter anders gedoen word nadat die navorsing deur die Raad vir Geesteswetenskaplike Navorsing getoon het daar is ʼn moontlikheid vir verwarring onder kiesers aangesien sommige partye soortgelyke kleure, afkortings en logo’s gebruik.

Daar is onder meer voorgestel dat partye wat soortgelyke kleure en logo’s het, en dus makliker verwarring onder kiesers kan veroorsaak, doelbewus van mekaar geskei word op die stembrief.

Die OVK het gevolglik besluit dat daar steeds ʼn lukrake trekking gedoen sal word om te bepaal watter party eerste op die stembrief verskyn, waarna die res in alfabetiese volgorde sal verskyn. Waar daar egter partye langs mekaar beland wat kiesers kan verwar, sal daar weer ʼn lukrake trekking gehou word om te help om dié partye te skei.

Vanjaar sal elke partye se volle naam eerste verskyn, gevolg deur ʼn foto van die partyleier, die afkorting van die party en laaste die party se logo.

Die trekking om te bepaal watter party eerste op die stembrief sal kom, is op 20 Maart gedoen. Die African Security Congress (ASC) se naam is getrek en dié party sal dus eerste op die stembrief verskyn, gevolg deur die African Transformation Movement, die Afrikan Alliance of Social Democrats en die African National Congress.

Daar is ook ʼn trekking gehou om te bepaal hoe die African Independent Congress (AIC), die African National Congress (ANC) en die African People’s Convention (APC) geskei sal word, aangesien dié partye se name moontlik verwarring vir kiesers kan veroorsaak.

Altesaam 48 politieke partye verskyn op die stembrief, 19 partye meer as in die vorige algemene verkiesing.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

43 Kommentare

jongste oudste gewildste
Theoman

Genugtig ! op die voorbeeld sien ek nerens die Vryheids Front Plus (VF Plus) nie Wat NOU?

Genieve

Wies ATM?????..en BLF is ook opi die kieserslys.

Blompatroon

48 politieke partye!? Dis belaglik, sny dit af na 6 politieke partye.

**Theoman die VF Plus sal op die agterkant van die A4 blaaitjie verskyn, dis mos ‘n ‘double sided’

Michael

Theoman dit is net n voorbeeld maar daar is nie plek vir almal nie iets soos 200 partye wat deel neem aan hierdie sirkus van die name nog nooit gehoor nie en van hulle hoor jy elke 5 jaar dit is om van te lag niks anders nie

Maak asb GOU

Asb ek hoop iemand bring dit onder Raad vir geesteswetenskap se aandag dat die VF + onder die lys van partye is nie. Al is dit dalk net ‘n voorbeeld. Foute glip maklik in.