Vermiste man se lyk in vlak graf gevind

Die vlak graf waar die man se liggaam gevind is. Foto: SAPD

ʼn Middeljarige man wat sedert Oktober vermis was, se liggaam is in ʼn vlak graf naby ʼn wildsplaas in Limpopo gevind.

Lt.kol. Moatshe Ngoepe, provinsiale polisiewoordvoerder, het Saterdag gesê die man, ʼn Egiptenaar in sy 40’s, is in Oktober by die Marble Hall-polisie as vermis aangemeld. Daar is vermoed dat hy aangeval, vermoor en van sy voertuig beroof is.

“ʼn Soektog na die man is van stapel gestuur, waarna sy liggaam in ʼn vlak graf in ʼn veld langs ʼn rivier in die Rakgoadi-omgewing opgespoor is,” het Ngoepe gesê.

Speurwerk het tot drie verdagtes se inhegtenisneming in die Ditholong-nedersetting gelei. Die polisie het tydens hul inhegtenisneming beslag gelê op die slagoffer se voertuig en voorwerpe waarmee hy glo vermoor is.

Die verdagtes, tussen 24 en 41 jaar oud, moet Maandag in die Motetema-landdroshof verskyn op aanklagte van ontvoering, moord, roof en die besit van ʼn beweerde gesteelde voertuig.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Een kommentaar

marianne ·

Hulle het darem die man begrawe….. waarom al die moorde??? Is dit werklik ‘n geval can vreemdelinge haat???
Almal gaan mekaar dan uitmoor want selfs families vervreemd…. dis hartseer.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.