Skermgreep uit die video
ʼn Laerskoolmeisie is Donderdag wonderbaarlik uit ʼn voertuig gered ná ʼn vragmotor se vrag tydens ʼn fratsongeluk op haar pa se motor beland het.
Drakenstein Farm Watch het in ʼn verklaring gesê ʼn konstruksievoertuig, wat minstens 20 ton weeg, het net voor 14:30 tydens padwerke sy vrag verloor en op ʼn verbygaande voertuig beland.
Die voorval het op die Paarl R301 in die rigting van Franschhoek, oorkant Boschenmeer-landgoed, plaasgevind.
Die passasierskant van die voertuig is getref en die laerskoolmeisie was in die voertuig vasgekeer. Haar pa kon wonderbaarlik uit die voertuig klim met ligte kopbeserings en skrape. Hy was baie bekommerd oor sy dogter en het haar nie vir ʼn oomblik alleen gelos nie.
Drakenstein Farm Watch se nooddiensvrywilligers het na die toneel gehaas om bevelvoerder R. Borbon Lefty en vrywilliger Ricardo Cant by te staan. Hulle was die eerste nooddienspersoneel op die toneel.
Die reddingsoperasie het meer as twee ure lank geduur deur verskeie reddingspanne van verskillende organisasies. “Almal het goed saamgewerk en hul bes gedoen om die meisie te red,” het DFW bygevoeg.
Die vragmotor is uiteindelik versigtig opgelig en die voertuig is met meganiese toerusting oopgesny om die meisie te bevry.
Sy is met ʼn ambulans na ʼn hospitaal geneem. Die polisie sal die fratsongeluk ondersoek.
“Ons hoop die dapper jong meisie sal ten volle herstel van dié verskriklike en traumatiese voorval. Baie dankie aan almal wat aan die suksesvolle redding deelgeneem het.”
DFW het spesiaal ook dankie gesê aan Drakenstein se munisipale brandweer, EMS Rescue, EMS Metro, EMS-ambulansdiens, ER24, Drakenstein-verkeersdienste, Paarl-polisiestasie en die span van Mediclinic.
