Video: Ouers haal ‘boelie’ uit skool ná skokvideo

ʼn Distriksdirekteur van die departement van onderwys het Maandag die Hoërskool Luckhoff in Idasvallei, Stellenbosch, besoek nadat ʼn video aan die lig gekom het van ʼn meisie wat wreed geboelie word.

Jessica Shelver, woordvoerder van die Wes-Kaapse departement van onderwys, het gesê hulle is geskok oor die gewelddadige aard van die video. Die video wys hoe ʼn meisie ʼn ander meisie se kop teen haar knie slaan, dan haar hare trek en haar ook in die gesig klap.

Volgens Shelver is ʼn dissiplinêre verhoor vir 8 Desember geskeduleer. “Die ouers van die boelie het haar intussen vrywilliglik uit die skool gehaal. Die dissiplinêre verhoor sal egter voortgaan.”

Shelver het gesê die slagoffer kry ondersteuning en ondergaan berading. “Die LUR het intussen ook versoek dat die skool van die begin van volgende jaar teen-boelie-programme aanbied.”

Shelver het gesê hulle beskou boeliery in ʼn baie ernstige lig. “Enige vorm van boeliery kan ernstige gevolge hê, en ons moet dienooreenkomstig en tydig daarop reageer. Dit is van kardinale belang dat die regte van leerders gerespekteer en beskerm word en dat leeromgewings geskep word waar leerders vry van mishandeling ten volle gebruik kan maak van hul leergeleenthede.”

Shelver het ʼn beroep gedoen op alle ouers en leerders om onmiddellik enige vorm van boeliery by skole aan te meld by 0800 45 46 47.

Waarskuwing: Die video is grafies van aard en kan sensitiewe lesers ontstel.