Video: Taxi ry matriekseun van motorfiets af

Die motorfiets onder die taxi vasgepen. (Foto: Verskaf)

’n Saak van roekelose en nalatige bestuur is by die polisie in Gauteng aanhangig gemaak nadat ’n minibustaxibestuurder ʼn matriekseun van sy motorfiets afgery het.

Daar kan in ’n video van die voorval gesien word hoe die taxi oënskynlik van agter op Kelvin Harkema (18) se motorfiets in Roodepoort, wes van Johannesburg, afpyl. Dit jaag bo-oor die motorfiets en kom dan tot stilstand.

Volgens paramedici op die toneel was Kelvin bitter gelukkig om nie ernstige beserings of beenbreuke op te doen nie, maar “daar is niks op sy lyf wat nié seer is nie”, vertel sy pa, Diederik Harkema.

Die voorval het Vrydag omstreeks 06:40 in Progressweg plaasgevind toe Kelvin, ’n leerder aan die Hoërskool Bastion in Krugersdorp, op pad skool toe was.

Diederik vertel aan Maroela Media dat sy seun in die middel van die baan volgens die spoedbeperking gery het toe ’n taxi skielik van agter teen hom vasgery het.

Die motorfiets onder die taxi vasgepen. (Foto: Verskaf)

Sy seun se motorfiets was met Diederik se aankoms op die toneel nog onder die taxi vasgepen. Die bestuurder van die taxi se verweer op die toneel was dat Kelvin skielik tot stilstand gekom het en dat hy nie betyds kon rem nie.

Die video van die voorval vertel egter ’n ander storie.

Volgens Diederik kan daar in die video gesien word hoe die taxibestuurder maar “’n kwartsekond” voordat hy die motorfiets tref eers ’n poging aanwend om rem aan te slaan.

Kelvin is Vrydagoggend op die toneel deur paramedici ondersoek wat aangedui het dat hy wonderbaarlik genoeg nie na ’n hospitaal geneem hoef te word nie. Hy het daarop aangedring om steeds die oggend skool toe te gaan, maar verduur dae later steeds pyn.

Kelvin se motorfiets, waaraan hy die afgelope paar maande geld bestee het om dit te verbeter, is afgeskryf.

“Dit is moeilik aangesien ek moet sit en hoop dat reg en geregtigheid geskied,” sê Diederik oor sy seun se noue ontkoming.

Die bestuurder van die taxi is volgens Diederik steeds nie aangekeer nie. Hy sê die taxi het ook nie ’n geldige lisensie gehad nie.

Maroela Media het ’n navraag aan die polisie gestuur en wag op terugvoer.

Posted by Diederik Harkema on Friday, June 4, 2021

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

42 Kommentare

jongste oudste gewildste
Jywilwat

Strafbare manslag. Sluit hom onmiddelik toe!

Thereza

Dit is poging tot moord

Jan Seerot

Goeiste mense, hierdie is strafbare manslag.

Willemien

Die video vertel die volle storie. Dit is skokkend dat die taxibestuurder nog nie aangekeer is nie. En ‘n absolute genade van Bo dat die seun nie ernstig beseer is nie!

Gert

Hy is n kadder hy kan maak wat hy wil