Vierjarige sterf toe kapers hom buite kar sleep

Argieffoto

ʼn Vierjarige seuntjie is Saterdagaand in Boksburg, Gauteng, dood nadat kapers hom buite ʼn motor gesleep het.

“Die seuntjie was in Reigerpark saam met sy ma, pa en sussie ʼn City Golf toe drie mans die gesin genader het,” het lt.kol. Khensane Magoai, woordvoerder van die polisie in Gauteng, gesê. “Hulle het die pa, sy vrou en dogter aangesê om uit die motor te klim. Die vierjarige was met ʼn veiligheidsgordel vasgemaak. Hulle het toe in die motor geklim en weggery.”

Magoai sê dit is nie duidelik wat presies gebeur het nie, maar die seuntjie is buite die motor gesleep, hy het aan sy veiligheidsgordel by die deur uitgehang. “Hy is ongeveer 8.5 km ver van Reigerpark tot by Boksburg buite die motor gesleep. Die kapers het die motor verlaat en die seun was dood.”

Niemand is nog in verband met die voorval in hegtenis geneem nie. “Ons is nog op soek na die verdagtes.”