Vuurwapen-voorstel ‘irrasioneel, absurd en ontstellend’

(Argieffoto: Lorraine Claasen)

Landbou-organisasies het sterk teen die voorgestelde wysigings aan die Wet op die Beheer van Vuurwapens te velde getrek.

“Die minister van polisie se konsepvoorstelle om die Wet op die Beheer van Vuurwapens te wysig en selfverdediging as ’n geldige rede om ’n vuurwapen te besit uit te sluit, is onverantwoordelik en irrasioneel,” het Uys van der Westhuijzen, voorsitter van Agri SA se sentrum van uitnemendheid: landelike beveiliging, gesê.

“Agri SA verwerp dit ten sterkste. Dit is veral die verwydering en miskenning van die universele reg tot selfverdediging wat in die konsepvoorstelle ingesluit is wat met alle mag deur Suid-Afrikaners teëgestaan behoort te word,” sê Van der Westhuijzen.

Indien die voorstel oor selfverdediging deurgevoer word, is dit veral die boerderygemeenskap wat nadelig daardeur geraak sal word omdat hulle in afgeleë gebiede woonagtig is, ver van ’n naaste polisiestasie. “Hulle is hoofsaaklik op hulself aangewese om hulle teen kriminele te beskerm.

“Die styging in die land se moordsyfer in die vierde kwartaal bevestig net weer die noodsaak vir landsburgers om hulself te beskerm. Die voorgestelde wysigings aan selfverdediging maak dus vir seker nie sin nie! Die polisie se onvermoë om sy grondwetlike verantwoordelikheid na te kom om alle Suid-Afrikaners teen misdaad te beskerm, plaas dié verantwoordelikheid op gewone landsburgers. Die verwydering van die reg tot selfverdediging maak dit vir seker nóg makliker vir misdadigers.”

TLU SA het gesê hy vind die voorgestelde veranderinge aan die Wapenwet nie net absurd nie, maar ook teenstrydig met die Suid-Afrikaanse Grondwet.

“Suid-Afrikaners is soos dinge staan, reeds soos voëls op ʼn tak wat links en regs moet koes vir skote wat afgevuur word, letterlik en figuurlik,” het Henry Geldenhuys, die president van TLU SA, gesê. “Solank as wat misdaad in die land hoogty vier en die regering nie die veiligheid van elke Suid-Afrikaner kan waarborg nie, is die voorstel dat vuurwapens nie vir selfverdediging gebruik mag word nie belaglik.

“Om te verwag dat boere, wat verafgeleë en afgesonderd is, hulself nie mag beskerm nie, is ondenkbaar. Hoekom spandeer die regering nie eerder tyd, geld en hulpbronne daaraan om eers die onwettige wapens in die hande van bendelede en ander misdadigers te verwyder in plaas van om wettige vuurwapeneienaars te teiken nie?” het Geldenhuys gevra.

Hierdie voorstelle sal geensins die misdaadprobleem in Suid-Afrika oplos nie, het Geldenhuys gesê. “Dit sal net daartoe lei dat vuurwapeneienaars oor die gebruik van vuurwapens lieg of die proses heeltemal systap deur wapens onwettig te gebruik.”

Vrystaat Landbou (VL) het in reaksie op die voorgestelde wysigings gesê selfverdediging is elke mens se reg en kan nie deur die staat aan bande gelê word nie.

“Die blote gedagte dat die regering so ’n voorstel sal opper, in ’n land met van die hoogste moordsyfers in die wêreld, is nie net verregaande nie, maar uiters ontstellend en gaan tot ʼn toename in kriminele anargie lei,” het Francois Wilken, president van VL, gesê.

Wilken sê verder dat veral landelike gemeenskappe reeds kwesbaar is, soos onlangs in statistieke oor die toename in plaasaanvalle en -moorde uitgewys, en nie kan bekostig om van wettige vuurwapens ontneem te word nie.

“Die staat se onvermoë om sy burgery teen toenemende kriminaliteit te beskerm, die persepsie dat kriminele meer regte het en vuurwapens mag besit wat gewoonlik onwettig is, en nie meer die reg het om hom-/haarself te verdedig nie, is absurd en ongrondwetlik.”

VL het gesê hy sal eersdaags ʼn veldtog van stapel stuur ten einde die voorgestelde wetswysigings op die Vuurwapenbeheerwet teen te staan. TLU SA het intussen reeds na verteenwoordigende organisasies wat dieselfde uitkoms nastreef, uitgereik om oor hierdie kwessies te vergader. Agri SA het gesê hy sal met insette van sy lede-organisasies kommentaar lewer op die voorgestelde wysigings en, waar nodig, met ander organisasies saamwerk om wysigings tot nadeel van mede-Suid-Afrikaners teë te staan.

Agri SA het ook die verdere voorstelle oor die geldigheidsduur van ’n bevoegdheidsertifikaat en die verdere beperking op die aantal vuurwapens vir geleentheidsjag en sportskiet, as eweneens onaanvaarbaar bestempel.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

55 Kommentare

jongste oudste gewildste
Sobymykoolkop

Dis darem nou ” toevallig ” dat dit in die tyd van onteiening sonder vergoeding val.

George

Koop jou wapen terug op die swartmark, dan is jy mos nou “wettig” om jouself te verdedig.

Andries

Slegs ‘n idioot sal sy vuurwapen prysgee en verwag die misdadiger sal dit ook doen.

Andries

Sogenaamde bbp beveiliging se begroting word verhoog…

Dan word van bv. Boere verwag, om in rus en vrede in hul huise te sit, wanneer hulle aangeval word!

ANC, julle soek mos nou moeilikheid…

Misky

Weereens is die regering besig om van eerlike burgers, kriminele te maak en ons SAL die wet oortree om onsself te beskerm. Ons wou dinge eerlik doen, maar julle wil nie die game speel nie