Byna vyf jaar ná die moord op ʼn boer van Lutzville in die Wes-Kaap, is die polisie steeds op soek na Jaco Louw se moordenaar.
Die Wes-Kaapse polisie se eenheid vir onopgeloste sake het nou opnuut ʼn beroep op mense gedoen om na vore te kom met enige inligting wat kan help om Jaco Louw se moordenaars aan te keer.
ʼn Plaaswerker het op Sondag 10 Februarie 2019 op die 57-jarige Louw se liggaam afgekom. Maroela Media het destyds berig Louw, wat alleen op die plaas gewoon het, is met ʼn steekwond aangetref. Hy is vermoedelik die dag tevore al op die plaas Rusverstand vermoor.
Dit was in daardie stadium onduidelik hoeveel aanvallers by die voorval betrokke was en of enigiets uit sy huis gebuit is.
Sers. Wesley Twigg, Wes-Kaapse polisiewoordvoerder, het Woensdag gesê Louw is “geskiet en vermoor deur onbekende verdagtes wat met ʼn ongenoemde bedrag geld en ʼn vuurwapen wat aan die slagoffer behoort het, van die toneel gevlug het”.
Enigiemand met inligting oor die voorval kan die ondersoekbeampte, sers. Clayton Lewis, bel by 082 469 2461 of die polisie se Stop Misdaad-nommer by 08600 10111.
Weinig vordering? Dit klink na absoluut gèèn vordering.