Wet op Diensbillikheid: Solidariteit maak gereed vir enorme regstryd

Dr. Dirk Herman, bestuurshoof van Solidariteit. (Foto: Dirk Hermann/Facebook)

Solidariteit maak nou gereed vir “ ʼn enorme regstryd” oor die nuwe Wet op Diensbillikheid nadat pres. Cyril Ramaphosa dié wet Woensdag bekragtig het.

Solidariteit het reeds in Augustus verlede jaar aan die president geskryf en daarop gewys dat die wysigings aan dié wet ongrondwetlik is. Die vakbond sê hy het ook ʼn regsopinie verkry wat dit bevestig en dat Solidariteit voorleggings in hierdie verband aan die parlement gemaak het.

“Die president is dus bewus dat Solidariteit hof toe sou gaan as hy die wet sou teken. Hy het dit nou inderdaad gedoen en ons berei nou vir die hof voor,” het dr. Dirk Hermann, bestuurshoof van Solidariteit, Woensdag gesê.

Solidariteit het voorheen daarop gewys dat die gewysigde wet nie net ongrondwetlik is nie, maar ook strydig is met ʼn vroeëre bevinding van die Suid-Afrikaanse Menseregtekommissie (SAMRK) wat daarop dui dat Suid-Afrika se rassewetgewing ongrondwetlik is en nie met internasionale norme en waardes strook nie.

Maroela Media het vroeër berig die wysigingswetsontwerp stel numeriese sektor-spesifieke indiensnemingsteikens om diegene wat steeds onderverteenwoordig in die werkplek is – swart mense, vroue en mense met gestremdhede – in diens te neem.

Volgens Solidariteit verleen hierdie wetgewing drakoniese rassemagte aan die minister. Solidariteit se regspan het derhalwe reeds begin voorberei vir litigasie en het aangedui dat hy sy hofstukke binnekort sal beteken.

“Die minister kan nou sentrale rassebeplanning op grond van eie diskresie doen. Dit sal die mees ingrypende rasmanipulerende wetgewing ter wêreld wees. Na verwagting sal die private sektor die voorbeeld van die staat moet volg. Private ondernemings sal staatsbestuurde rasse-ondernemings word,” sê Hermann.

“Hierdie wet, wat rasseteikens op sektore afdwing, sal rampspoedige gevolge vir ons ekonomie inhou. Nuwe definisies van “aangewese werkgewers” gaan klein ondernemings dwing om klein te bly en duisende werke kos.”

Hermann sê vir diegene wat gelukkig genoeg is om wel hul werk te behou, gaan dit enige bevorderingsmoontlikhede heeltemal stuit.

“Dit sal meebring dat die uittog van vaardighede na die buiteland net gaan versnel en Suid-Afrika se ekonomie – soos sy staatsdiens – gaan toenemend in ʼn spiraal van ondoeltreffendheid, inkrimping en dreigende ineenstorting vasgevang raak. Die staat se rasmalheid moet tot elke prys teengestaan word. Ons kan eenvoudig nie bekostig om dit nié te doen nie.”

“Sonder ingryping sal hierdie regering sy beleid van ondoeltreffende sentralisasie voortsit en selfs so ver gaan om die mensehulpbronfunksie in organisasies oor te neem.”