‘Zuma moet SA se vertroue terugwen’

Pres. Jacob Zuma. Foto: Ntswe Mokoena, departement van kommunikasie

Pres. Jacob Zuma. Foto: Ntswe Mokoena, departement van kommunikasie

Pres. Jacob Zuma moet sy staatsrede gebruik om die vertroue van Suid-Afrikaners terug te wen, het ʼn senior politieke ontleder gesê.

“Die vertroue in Zuma en groot instellings soos die parlement het ʼn nuwe laagtepunt bereik,” het prof. Amanda Gouws van die Universiteit Stellenbosch gesê. “Zuma moet probeer om nie leë beloftes te maak nie, maar beloftes wat vertroue in die regering sal herstel.”

Die EFF het Zuma reeds gewaarsku dat hy nie sy staatsrede sal kan lewer voor hy vrae beantwoord oor die afdanking van Nhlanhla Nene as minister van finansies nie. EFF-LP’s het verlede jaar Zuma se staatsrede ontwrig en geweier dat hy praat voor hy nie vrae antwoord oor wanneer hy ʼn gedeelte van die geld wat op Nkandla spandeer is gaan terugbetaal nie. Die EFF-LP’s is hierna uit die parlement verwyder.

Gouws het gesê hoewel sy glo dat die EFF geldige besware het, die staatsrede nie die geleë tyd is vir “ontwrigtende politiek” nie. “Ek dink dit is nadelig vir ordelike politiek en hoewel die Nkandla-sage ʼn  geldige kwessie is, dink ek dat die situasie met Nene opgelos is en dit nie die moeite werd is om hierdie ontwrigting te veroorsaak op ʼn tyd wat werklik krities in die geskiedenis van Suid-Afrika is nie.”

Die DA het Woensdag gesê dit is van kritieke belang dat Zuma sy regering daartoe verbind om ʼn verdere kredietafgradering te voorkom aangesien dit die ekonomie verder sal skaad. Volgens die DA sal die beplande ontwrigting deur die EEF Suid-Afrikaners ontneem van die geleentheid om Zuma verantwoordbaar te hou.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

31 Kommentare

jongste oudste gewildste
Anel

Ek dink nie daar is enige iets wat Zuma kan doen om vertroue terug te wen nie. Hy het al te veel afgebreek. Die beste ding wat hy kan doen is om die tuig neer te lê

Mooi stories

Wat maak dit saak wat hy se of beloof? Min of geen van die beloftes wat hy in vorige staatsredes gemaak het, het ooit realiseer nie. Net nog mooi stories en lee beloftes.

Berhalet Beukes

Dit gaan nie gebeur nie!

Matmiet

Al manier is om af te tree en te verdwyn.

Ben (:-)

Net 5 % van lesers wil weet wat zuma gaan se – so hy het verbruikers vertroue verloor.