Zuma oorweeg om NVG se besluit oor vervolging te daag

Pres. Jacob Zuma (Foto: ANA)

Oudpres. Jacob Zuma oorweeg om die Nasionale Vervolgingsgesag (NVG) se besluit om hom te vervolg, te hersien, het sy prokureur Michael Hulley Saterdag gesê.

Shaun Abrahams, nasionale direkteur van openbare vervolging, het Vrydagmiddag aangekondig dat Zuma in die hof sal moet verskyn op aanklagte van bedrog, swendelary, korrupsie en geldwassery.

Al 16 aanklagte in die 2007-klagstaat, wat in 2009 deur die voormalige nasionale direkteur van openbare vervolging, Mokotedi Mpshe, laat vaar is, sal weer ingestel word. Die aanklagte sluit een van swendelary, twee van korrupsie, een van geldwassery en 12 van bedrog in.

“Ons hersien die eenbladsydokument en ietwat bondige reaksie wat ons van die nasionale direkteur van vervolging ontvang het waarin hy aandui dat mnr. Jacob Zuma se redes, waarom hy nie vervolg moet word nie, onsuksesvol was,” het Hulley Saterdag in ʼn kort verklaring gesê.

“Die beweegredes vir hierdie besluit is nie duidelik uit die kommunikasie nie, so ook nie die basis waarop die aansoek afgekeur is nie. Die besluit van die nasionale direkteur van openbare vervolging sal gevolglik oorweeg word. Die besluit hieroor sal egter eers bekend gemaak word ná deeglike oorweging en gesprekke met mnr. Zuma,” het Hulley bygevoeg.

Abrahams het Vrydag tydens ʼn perskonferensie gesê daar bestaan ʼn redelike vooruitsig dat Zuma se vervolging suksesvol sal wees.

Zuma het in die redes wat hy verskaf het waarom hy nie vervolg moet word nie, alle bewerings teen hom ten sterkste ontken.

“Mnr. Zuma se terugvoer hou grootliks verband met die bewerings van ʼn vervolging wat gekenmerk word deur manipulasie, onbehoorlikheid, vervolgingswangedrag, doelbewuste uitlek van inligting aan die media en irrasionele besluite deur verskeie nasionale direkteure en/of waarnemende nasionale direkteure van openbare vervolging, tesame met die onverklaarbare vertraging van ongeveer 15 jaar om dié saak in die hof te kry,” het Abrahams gesê.

“Mnr. Zuma lê dié bewerings direk voor die deur van die Nasionale Vervolgingsgesag, sommige voormalige nasionale direkteure van openbare vervolging, waarnemende nasionale direkteure, sommige persone in die leierskap van die NVG en sommige staatsaanklaers en ondersoekbeamptes,” het Abrahams gesê.

Die saak teen Zuma is in 2009 teruggetrek en het vir hom die weg gebaan om president te word. Die hooggeregshof het verlede jaar beslis dat Mpshe se besluit irrasioneel was. Die hoogste hof van appèl het daarna Zuma se aansoek om verlof tot appèl teen dié uitspraak afgekeur.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

23 Kommentare

jongste oudste gewildste
Gustav

Genade wat is nou so moeilik, sê net vir Zuma om op te hou om almal se tyd te mors en gaan bewys dan jou sogenaamde onskuld in die hof. Regtig niemand moet eers met hom praat nie, want hy geniet dit nog steeds dat sommige mense na hom luister

Justice

Indien Hulley nie `n groot finansiele waarborg vanaf Zuma verkry het nie moet hy weet dat hy van nou af pro-bono optree. Die belastingbetalers gaan nie meer sy reuse rekening namens Zuma betaal nie.

Rynhardt

Die DA prys homself al klaar dat Zuma tronk toe gaan.DA,julle liberale vier te gou fees! Baie kinkels en kabels le nog voor in Zuma-saak,alles in die naam van wonderlike demokrasie!

Manie

Ek hoop net hierdie skelm betaal self vir sy hofaansoeke

Grassie

Dit is vermetel van Hulley om die Staat se reg op vervolging te probeer betwis. Abrahams praat ook te veel – sy beslissing moes bloot gelui het dat die Staat besluit het om Zuma op grond van die beskikbare getuienis te vervolg en dat die juridiese proses dadelik in werking gestel sal word. Punt.
Wat my wel bekommer is dat die hele aangeleentheid nou reeds vir ‘n baie lang tyd in Zuma-dissipels se hande was. Dit sal my nie verbaas as daar met die getuienis gepeuter is nie.