Bloodhound LSR haal meer as 1 000 km/h

Bloodhound (Foto: The Bloodhound Project/Facebook)

ʼn Supersoniese motor van die Bloodhound-landspoedrekordspan het Saterdag 1 010 km/h gehaal.

Die blitsige motor het vroeër reeds een van die wêreld se 10 vinnigste motors geword en die teiken, om ʼn nuwe landspoedrekord op te stel, is in die vooruitsig.

‪Die span het Saterdag op Facebook bevestig hulle het 628 mph (1 010 km/h) op Hakskeenpan in die Noord-Kaap gehaal.

“Die gevoel in die motor is fantasties,” het bestuurder Andy Green Vrydag aan die Associated Press gesê.

Die motor word aangevuur deur ʼn Rolls-Royce EJ200, dieselfde stralerenjin wat in die Eurofighter Typhoon-stralervliegtuig gebruik word. Die motor jaag só vinnig oor die soutpan dat ʼn dubbele valskerm gebruik moet word om dit tot stilstand te bring.

Bloodhound, met dieselfde aërodinamiese lyne van ʼn vuurpyl, is in Engeland ontwerp en gebou deur Grafton LSR. Dit is uit mekaar gehaal en met ʼn vliegtuig na Suid-Afrika vervoer waar dit weer aan mekaar gesit is.

Die 57-jarige Green was ʼn vegvlieënier in Engeland se Royal Air Force.

Bloodhound (Foto: The Bloodhound Project/Facebook)

Hy en die Grafton-span is vol verwagting om binne die volgende jaar die huidige landspoedrekord van 1 227 km/h te verbeter. Green het daardie rekord in 1997 met ʼn ander motor opgestel.

Die uiteindelike teiken is om Bloodhound se stralerenjin met ʼn vuurpylenjin aan te vuur en veilig 1 000 mph (1 609 km/h) te haal – wat vinniger sal wees as die klankgrens (1 234 km/h).

Volgens Green is Hakskeenpan die ideale ligging.

Die Noord-Kaapse regering het meer as 300 persone van die plaaslike Mier-gemeenskap aangestel om oor ʼn jaar lank meer as 15 000 metrieke ton klippe van die 19 km lange baan te verwyder, het Jules Tipler, woordvoerder van Bloodhound, gesê.

“Hulle het die beste reguit hoëspoedbaan in die wêreld geskep,” het Green bygevoeg en gesê dit is selfs beter as die Black Rock Desert-baan in Nevada in die VSA. “Die baan is harder, het ʼn beter oppervlak en die weer is baie beter. Ons het ses maande se skoon weer om hier te toets.”

Volg Bloodhound se vordering op Facebook

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

23 Kommentare

jongste oudste gewildste
Gerhard

Baie opwindend!
Net een opmerking: Hoe kan die artikel na die motor as “supersonies” verwys as dit nog nie vinniger as die spoed van klank gery het nie?

Johann cb

Ek glo nie ons kan na hierdie vuurpyl as ‘n motor verwys nie! Dit is erg onrealisties! Dit is nie ‘n padmotor nie, en ons het spoedbeperkings op alle paaie!

JohanR

Seker probeer wegkom van kapers. Dit is nou eens Suid Afrika, en hulle is orrels!

Blommie

En ons paaie is té vol slaggate!!!!

bokke

Ek het nie geweet Hakskeenpan is die wereld se grootste onverwerkte soutpan nie.