Laaste oorblywende van dié stam ook oorlede

Skermskoot uit die video

Beamptes van Funai, Brasilië se organisasie wat inheemse bevolkings beskerm, sê die laaste oorblywende lid van ʼn stam wat al jare lank gevolg word, is oorlede. Dié stam is nou amptelik uitgesterf, berig die BBC.

Die liggaam van die man, vermoedelik ongeveer 60 jaar oud, is verlede Dinsdag deur Funai-beamptes in ʼn hangmat buite sy strooihut in Rondonia aangetref. Daar was “nie enige teken van ʼn struweling, geweld of teenwoordigheid van ander mense in die gebied nie”, aldus CNN.

Beamptes glo die man is weens natuurlike oorsake dood. Hy het helderkleurige vere om sy lyf geplaas, ʼn teken dat hy vermoedelik geweet het hy gaan sterf, berig die Guardian.

Die man het vir meer as ʼn kwarteeu alleen op die Tanaru- inheemse grond in die Amasone-reënwoud gewoon ná ses lede van sy stam in 1995 doodgemaak is. Die meeste van die res van die stam is vermoedelik in die 1970’s uitgemoor toe veeboere hul eie grondgebied wou vergroot en in die inheemse grondgebied inbeweeg het.

Funai-personeellede het in 2018 beeldmateriaal van die man verfilm waar hy ʼn boom afkap met ʼn stuk gereedskap wat soos ʼn byl lyk. Dit was die laaste keer dat hy amptelik opgemerk is.

Ná daardie voorval het beamptes op sy hutte afgekom en gate wat hy gegrawe het – vermoedelik ʼn lokval vir diere of om weg te kruip. Dit het hom die bynaam “Man van die gat” besorg.

Hy was nie ontvanklik vir enigiemand onbekend nie. Hy het pyle geskiet na enigiemand wat hom wou nader.

Funai het kos, sade en stukke gereedskap vir hom neergesit en het hom dekades lank gevolg vir sy eie veiligheid. Hy het egter nooit enige van die geskenke aanvaar nie. Funai-beamptes sê hy het waarskynlik ʼn goeie rede gehad: in die 1980’s het veeboere “geskenke” met rottegif uitgesit en dit het talle lede van sy stam doodgemaak.

“Met sy afsterwe is die menseslagting van sy volk afgehandel,” het Fiona Watson van die menseregtegroep Survival International aan CNN gesê. “Dit was inderdaad ʼn menseslagting – die doelbewuste uitwissing van ʼn hele volk deur veeboere wat grond en rykdom nagejaag het.”

Die polisie stel ondersoek in na die man se afsterwe. Sowat 300 inheemse volke woon steeds in Brasilië, waarvan ongeveer 30 stamme diep in die reënwoud woon.