’n New Yorkse vrou is Woensdagaand op straat doodgeskiet waar sy haar drie maande oue baba in ʼn stootwaentjie in die gegoede Upper East Side gestoot het.
’n Gewapende man het die 20-jarige vrou van agter af genader en een keer van naby in die kop geskiet voordat hy weggehardloop het.
Die skieter het ’n swart kappietop en swart broek aangehad. Niemand is nog in verband met die voorval in hegtenis geneem nie.
Die New York Times berig die voorval het net voor 20:30 by East 95th Street naby Lexingtonlaan by die Samuel Seabury-speelterrein plaasgevind.
Die vrou is ná die skietery na die Metropolitan Hospital Center geneem waar sy later dood verklaar is. Haar baba is ongedeerd.
Die baba is wel hospitaal toe geneem om ondersoek te word, berig The Washington Post.
Julie Menin, ’n lid van die stadsraad wat ’n deel van die Upper East Side-buurt verteenwoordig, het die moord as “absoluut verfoeilik” beskryf.
Inwoners is ook geskok.
“Dit is ’n wonderlike woonbuurt,” sê Rahul Rathod, wat nege maande gelede ingetrek het. Volgens Rathod is dit saans stil in die buurt weens die groot aantal ouer inwoners. Kinders speel egter tot laat nag nog basketbal op die Seabury-bane.
Luidens die New York Times se berig is dit die eerste moord in die betrokke gebied vanjaar, met slegs een moord verlede jaar in dié gegoede buurt. Teen Sondag was daar egter reeds 624 skietvoorvalle vanjaar oor New York heen aangemeld vergeleke met 710 skietvoorvalle oor dieselfde tydperk in 2021 – ’n afname van 12%, maar steeds 28% meer vergeleke met 2019.
“Hierdie aanhoudende vuurwapengeweld moet end kry,” beklemtoon Menin.
On scene of horrific shooting of a mother with her baby at 95th and Lexington with @NYCMayor @NYPDPC @MarkLevineNYC @KeithPowersNYC. The mother has died and baby is ok. May involve domestic violence and is being investigated but hasn’t been confirmed. pic.twitter.com/5UX49rHJIu
— Julie Menin (@JulieMenin) June 30, 2022
Gelukkig weet ‘n baba van 3 maande dit nog nie, en het seker deur alles geslaap.
Dit klink soos n huurmoord.
En dan sê hulle Suid Afrika is onveilig! Sal eerder hier bly. Hier weet ons ten minste wie ons vyande is en ons is “street smart”! Daar word almal maar vertrou.
Wat is ‘n gegoede buurt? Is dit waar goeie mense wat met goeie geld ‘n goeie kopie gemaak het nou rustig hul goeie lewe geniet? By ons was daar ook destyds ‘n Kaap van Goeie Hoop. Ons is gou ontnugter.
Kom maak asseblief ‘n draai hier by ons, wil graag dan julle kommentaar hoor.