SA veroordeel missielaanval op Sirië

Missiele tref Damaskus (14 April 2018) Foto: AP Photo/Hassan Ammar

Die Suid-Afrikaanse regering het Maandag gesê hy is “diep bekommerd” oor die VSA en sy bondgenote, Frankryk en die Verenigde Koninkryk, se missielaanval die afgelope naweek op Sirië.

“Van die begin af toe die Sirië-krisis begin het, het Suid-Afrika deurlopend gevra vir ʼn vreedsame oplossing vir die konflik,” het Ndivhuwo Mabaya, woordvoerder vir die minister van internasionale verhoudinge en samewerking, gesê.

“Die beweerde gebruik van chemiese wapens in Sirië is nie ʼn regverdiging vir militêre lugaanvalle in ʼn gebied van ʼn soewereine staat sonder die goedkeuring van die Verenigde Nasies se veiligheidsraad nie. In dieselfde asem veroordeel Suid-Afrika die gebruik van chemiese wapens deur enige party in die Siriese gebied.”

Maroela Media het vroeër berig Amerika en sy bondgenote, Frankryk en die Verenigde Koninkryk, se missiele het Sirië Saterdag getref om Basjar al-Assad se regering te straf oor ʼn beweerde chemiese aanval op siviele burgers en om die regering te ontmoedig om weer dié verbode wapens te gebruik. Altesaam 105 missiele is na Sirië gestuur (85 van die VSA, 12 van Frankryk en agt van die Verenigde Koninkryk).

Die missiele is van oorlogskepe in die Mediterreense See afgevuur. Beamptes van die Pentagon, wat anoniem wou bly, het gesê Sirië se lugverdediging was ondoeltreffend.

Die Westerse lande blameer Assad vir die chemiese aanval op 7 April in Douma wat talle mense se lewens geëis het. Die Siriese regering en sy bondgenoot, Rusland, het ontken dat hulle betrokke was by die aanval.

Mabaya het gesê Suid-Afrika staan steeds sterk in sy mening dat die kwessie opgelos moet word binne die organisasie vir die verbod op chemiese wapens (OPCW) en die VN-veiligheidsraad. Hy het gesê Suid-Afrika doen ʼn beroep op al die lede van die VN-veiligheidsraad om pogings te verskerp om ʼn vreedsame oplossing te vind.

Die afgelope naweek se lugaanval is die grootste ingryping nog deur Westerse lande teen Assad.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

27 Kommentare

jongste oudste gewildste
Wessie

Die SA regering kan nie eers hul eie burgers se veiligheid op straat waarborg nie, maar het altyd ‘n eier te lê oor ander lande.
En die ‘beweerde’ gebruik van chemiese aanvalle deur Sirië blyk nie bewerings te wees nie, daar is mense dood!
Het ons lamsakkige regering enige veroordeling daaroor uitgespreek?

Johan

SA kan maar ophou kommentaar lewer…hulle moet eerder kyk na wat gebeur binne hul eie land…die.moorde op boere wat hulle “goekeur” met hul stilswye. Dink SA dat enige van hierdie moondhede hul enigsins aan hulle steur…???

Manie

Die anc het ongelukkig die geneigdheid om die oortreders van menseregte te beloon met hulle lojale ondersteuning. Wie in die weste gee nou elkgeval om wat hierdie mense aan die Suidpunt van Afrika te sê het

Lekker bang

Ja toe julle en Malema dink mos julle is koning en julle keur die aanvalle op boere goed en hits dit aan, wag tot die eerste missiel uit VSA SA tref dan praat ons weer oor KILL THE BOER en GRONDONTEIENING!

Willie

Ek is seker die VSA en sy bondgenote het hulself so pas doodgeskrik vir die teregwysing