VSA, VK, Frankryk loods missielaanval op Sirië

Missiele tref Damaskus (14 April 2018) Foto: AP Photo/Hassan Ammar

Amerika en sy bondgenote, Frankryk en die Verenigde Koninkryk, se missiele het Sirië Saterdag getref om Basjar al-Assad se regering te straf oor ʼn beweerde chemiese aanval op siviele burgers en die regering te ontmoedig om weer dié verbode wapens te gebruik.

Altesaam 105 missiele is na Sirië gestuur (85 van die VSA, 12 van Frankryk en agt van die Verenigde Koninkryk).

Pres. Donald Trump het vroeër op Twitter dit ʼn “perfekte trefskoot” genoem. “Mission accomplished!” het hy bygevoeg.

Sirië se bondgenote, Rusland en Iran, het die VSA, Brittanje en Frankryk se optrede as ʼn “militêre misdaad” beskryf en gewaarsku dat dit die humanitêre krisis kan vererger ná jarelange burgeroorlog.

Die Verenigde Nasies se veiligheidsraad sal Saterdag vergader, op versoek van Moskou.

“Goeie siele sal nie verneder word nie,” het Assad gesê, terwyl honderde Siriërs in Damaskus, die hoofstad, vergader het. Hulle het oorwinningstekens gewys en vlae rondgeswaai ná die uur lange spervuur wat Vrydagaand geloods is (vroeg Saterdag in Sirië).

Die missiele is van oorlogskepe in die Mediterreense See afgevuur. Beamptes van die Pentagon, wat anoniem wou bly, het gesê Sirië se lugverdediging was ondoeltreffend.

Die missiele het die hartjie van Assad se program, om chemiese wapens te ontwikkel en te vervaardig, geteiken. Genl. Joseph Dunford, hoof van die Amerikaanse weermag, het gesê die missiele het eerste ʼn wetenskapnavorsingsentrum in die hartjie van Damaskus getref waar Sirië navorsing, ontwikkeling, vervaardiging en toetsing gedoen het van chemiese en biologiese oorlogvoeringstegnologie. Die tweede teiken was ʼn stoorplek wes van Homs, waar chemiese wapens gestoor word. Die derde teiken was ʼn stoorplek en belangrike beheerpunt, ook wes van Homs, waar chemiese wapens gehou is.

ʼn Internasionale waghondgroep teen chemiese oorlogvoering het gesê sy sending in Douma, waar ʼn giftige gas glo op 7 April gebruik is en meer as 40 persone gesterf het, gaan soos beplan voort. Dit het aanleiding gegee tot die Westerse bondgenote om hul aanval teen Sirië te loods. Sirië ontken die beskuldiging.

Frankryk se minister van buitelandse sake het egter gesê daar bestaan “geen twyfel nie” dat die Assad-regering verantwoordelik was. Hy het gewaarsku dat daar nog aanvalle kan wees as chemiese wapens weer gebruik word.

Theresa May, Britse eerste minister, het uit Londen gesê die Weste het “alle moontlike” diplomatieke opsies probeer om Assad te verhoed om chemiese wapens te gebruik.

Emmanuel Macron, president van Frankryk, het gesê een van die teikens was die Siriese regering se “klandestiene chemiese arsenaal”.

Die Siriese regering het herhaaldelik ontken dat hy enige verbode wapens gebruik het.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

43 Kommentare

jongste oudste gewildste
Suné

Dagsê Herman

Die aanval het vanoggend in Sirië plaasgevind.

Groetnis
Suné
nms Maroela Media

Trix

Ons wag nou nog om Saddam Hussein en Gadaffi se wapens van massavernietuging te sien. Dieselfde leuens oor en oor!

Pierre

Om presies te wees, is die tellings as volg :-)

VSA:
66 Tomahawks missiele (missiele of misielle??)
19 JASSM-ER missiele

VK:
8 StormShadow missiele

Frankryk:
3 MdCN missiele
9 SCALP missiele

Kobus

Herman, as jy belangstel in die wapens en platvorms wat deur Amerika, die VK en Frankryk gebruik is, volg vir Jive Turkey op YouTube. Hy het voorheen op o.a. die Virginië-klas duikboot gedien en maak nou video’s van duikbootspeletjies. In hierdie video bespreek hy hierdie voorval se strategieë in fyn detail: https://youtu.be/1xsMS1jsxY8?t=7m39s

JoeV

Seker die grootste bedrog wat die wereld nog gesien het. Ons kwel ons oor Zuma!