Philip Baker Hall, die akteur wat ʼn gasspeler in die sitkom Seinfeld was, is in die ouderdom van 90 dood.
Hoewel hy in 1991 net in een episode was, was dié optrede so gewild dat hy vir die program se finale episode teruggenooi is.
Hy is ook bekend vir sy rolle in The Truman Show, Rush Hour, Magnolia en Boogie Nights. Hy het later jare ook rolle in Modern Family, Argo, The Talented Mr Ripley en Zodiac gehad.
Mark Ruffalo, met wie Hall die skerm in Zodiac gedeel het, het Dinsdag in ’n boodskap op Twitter sy medelye met die akteur se naasbestaandes betoon.
“Een van die grotes. Dit was ’n eer om saam met jou aan Zodiac te kon werk. Vriendelikheid, vrygewigheid, nederigheid en talent.”
Hall word deur sy vrou, vier dogters, vier kleinkinders en broer oorleef.