Prinses Beatrice en haar man, die eiendomsmagnaat Edoardo Mapelli Mozzi, se babadogter sal Sienna Elizabeth heet.
Koningin Elizabeth II se twaalfde agterkleinkind is op 18 September gebore en die jongste lid van die Britse koninklike familie is elfde in die troonopvolgingslyn.
Beatrice is die oudste dogter van die hertog en hertogin van York en is in Julie verlede jaar in ʼn private seremonie met Mozzi getroud. Sy is ook stiefma vir Christopher Woolf, beter bekend as Wolfie, uit Mozzi se vorige verhouding met Dara Huang.
Die prinses het in ʼn plasing op Instagram die babadogtertjie se naam bekend gemaak en die paartjie het ook ʼn afdruk van haar voetjies met aanhangers gedeel. Hulle het egter nie ʼn foto van die nuwe pienkvoet gedeel nie.
Die prinses het in die plasing geskryf dit gaan goed met almal en Wolfie is die beste ouboet vir Sienna.
Mozzi het op sy beurt ook ʼn aangrypende boodskap gedeel en gesê “hierdie is die dae wat hy nooit wil vergeet nie”.
Ná die geboorte van die hertog en hertogin van Sussex se tweede kind, Lilibet “Lili” Diana Mountbatten-Windsor in Junie, het Beatrice van die negende na die tiende plek in die troonopvolgingslyn geskuif.
Sy werk nie voltyds as koninklike nie, maar is steeds die beskermvrou van talle welsynsorganisasies.
Bykomende bron: BBC
Daar is nie meer plek vir die koningklikes in die nuwe wêreld nie. Hulle tyd is verby.
Is daar nie beter nuus nie
Lanklaas iets van oom Zuma gehoor. Leef hy nog?
Wat de hel het hy te doen met die hoogedele Britse Ryk!