Só lyk die duurste gesigmasker in die wêreld

Isaac Levy wys dele van die masker in Motza naby Jerusalem (9 Augustus 2020) (Foto: AP Photo/Sebastian Scheiner)

ʼn Israelse juweliersmaatskappy is besig om die wêreld se duurste koronavirus-masker te vervaardig met goud en diamante, ter waarde van $1,5 miljoen (meer as R26 miljoen).

Die masker, van 18 karaat witgoud, sal met 3 600 wit en swart diamante versier word met topgehalte N99-filters op versoek van die koper, het ontwerper Isaac Levy gesê.

Levy, eienaar van die Yvel-maatskappy, het gesê die koper het net twee eise gehad: dat dit voor die einde van die jaar gereed moet wees en dat dit die duurste in die wêreld moet wees. “Die laaste voorwaarde was die maklikste!”

Hy wou nie die naam van die koper bekendmaak nie, maar het gesê dit is ʼn sakeman van China wat in die VSA woon.

Die swierige masker sal beslis die beskermingstuk, wat nou in talle lande in openbare plekke verpligtend is opkikker, maar teen 270 g – sowat 100 keer swaarder as ʼn tipiese gesigmasker, is dit waarskynlik nie baie prakties nie.

Levy het tydens ʼn onderhoud by sy fabriek naby Jerusalem met verskeie dele van die masker gespog, almal bedek in diamante. Een goue plaat het ʼn gaatjie vir die filter.

“Geld koop dalk nie alles nie, maar as dit ʼn baie duur Covid-19-masker kan koop en die ou wil dit dra om aandag te trek, dan behoort hy hiermee tevrede te wees,” het Levy bygevoeg.

Só ʼn pronkerige masker sal waarskynlik kritiek uitlok in ʼn tyd waar miljoene mense wêreldwyd werkloos is of ekonomies baie swaarkry. Levy het gesê alhoewel hy nie self só tipe masker sou dra nie, is hy dankbaar vir die geleentheid. “Ek is bly dat die masker vir ons genoeg werk gegee het sodat ons personeel in dié moeilike tye kan bly werk.”