Solidariteit-afvaardiging by verkiesing in Oostenryk

Alle oë was Sondagaand op Sebastian Kurz, die leier van die Oostenrykse Volksparty, in Wene. Foto: Verskaf.

ʼn Afvaardiging van die Solidariteit Beweging het Sondagaand op uitnodiging van Oostenrykse politici die oorwinningstoespraak van Sebastian Kurz, die leier van die Oostenrykse Volksparty, in Wene bygewoon. Die sentrumregse Volksparty het in Sondag se vervroegde verkiesing ʼn historiese oorwinning behaal.

Die Solidariteit Beweging het vanjaar skakeling met regerings, politici en nieregeringsinstellings in Europa opgeskerp en die afgelope week is daar besoek gebring aan Nederland, België, Duitsland, Oostenryk en Italië.

Volgens Jaco Kleynhans, hoof van Internasionale Skakeling vir die Beweging bestaan daar hernude belangstelling in Europa oor die situasie in Suid-Afrika en is daar veral toenemend die geleentheid om Europese groepe by projekte in Suid-Afrika te betrek. Werner Human, adjunkbestuurshoof van Solidariteit en Hannes Noëth, uitvoerende direkteur van Solidariteit Helpende Hand, kon Sondagaand Sebastian Kurz persoonlik met sy verkiesingsoorwinning gelukwens.

V.l.n.r. is Jaco Kleynhans van die Solidariteit Beweging, Werner Human van Solidariteit, Sarina Frauenstein van Pretoria FM en Hannes Noëth van Helpende Hand. Foto: Verskaf.

Die Volksparty se verkiesingspartytjie in Wene is by ʼn groot konsertsaal aangebied en is deur politici, sakelui en verskeie internasionale afvaardigings bygewoon. Die Solidariteit Beweging skakel met verskeie politieke partye, oor die hele politieke spektrum, in Europa met die doel om inligting te versprei en betrokkenheid in Suid-Afrika te verhoog.

Volgens Kleynhans is die besoek tans veral daarop toegespits om bewustheid van die ANC-regering se grondonteieningsplanne te verhoog en om vennote vir die Beweging se maatskaplike- en opleidingsprojekte te vind.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

16 Kommentare

Chris du Plessis ·

ek hoop hulle het iets geleer oor selfbeskikking en onafhankliheid vir Afrikaners …

aj ·

Wat het geword van Praag se projek om die burgerskap van SAners in hulle Europese stamlande te herstel? Sodat SAners na hulle stamlande kan terugkeer?

Merkur ·

Hopenlik gaan Sebastian Kurz nie teleurstellend wees nie. Hy is definitief ´n akrobaat in verandering van sienswyses en volgens baie patriote en volgens my is hy nie betroubaar nie. Natuurlik hoop ek dat ek verkeerd is.

Kurz is ´n lidmaat van die European Council on Foreign Relations wat o.a. deur George Soros gestig is. Google Kurz Soros. Kurz het ook o.a. hierdie jaar gesê dat die konserwatiewe FPÖ (wat teen massa immigrasie is en verantwoordelik was dat die grense meer en meer gesluit geword het) skadelik vir Oostenryk is.

Party mense sien in hom die Oostenrykse Merkel: konserwatiewe lippebekendnis wat deur die eie aktiewe politiek ondermyn word.
Een ding is verseker, Kurz is geen patrioot nie.

Sterkte vir Solidariteit!

Hans ·

Moet ons altyd polities korrek liberaal wees? Ek dink dis geen probleem dat hul nuwe Oostenrykse staatshoof ontmoet nie. Hoop Solidariteit skakel met Orban in Hongarye ook.

Jaco Kleynhans ·

Hans,

Ons is definitief van plan om dit te doen. Jy sal binnekort meer daaroor hoor.

Al ·

Trots op jul! Dis ñ voorreg lid te wees van jul organisasie. Julle is bekwaam, georden, gedissiplineerd en het ongelooflike deursettingsvermoë.
Tou opgooi, bestaan nie in jul woordeskat nie.
Alle voorspoed en sukses bid ek jul toe.

GL ·

Wat is die eind doel hiermee?Wat sal vir ons as Blankes verbeter? Jammer maar ek is nie n politikus nie.

Disselboom ·

Interessant hoe Engelse media na “People’s Party” verwys, wat volgens die berig hierbo “Volksparty” is, maar in Suid-Afrika beteken “People’s Party” iets anders as “Volksparty”. Soos @GL opmerk, mens moet seker ‘n politikus wees om te verstaan wat presies wat dit beteken/ watter waarde dit het om by ‘n jong snuiter met liberale lewenstyl se oorwinningspartytjie te wees. Deel van die uitgebreide “werk- en kultuurtoer” van Solidariteit-werknemers in Europa. Dis nie duidelik presies wat die waarde van hierdie spandering is nie?

Johan Neuteman ·

Ek is ook maar nie polities bedrewe nie, maar dink mens moet Solidariteit kans gee om dalk net meer inligting te gee oor die ontmoeting, en as dit waar is van ‘n hele toer, is daar seker ‘n goeie rede daar agter. Vir my half moeilik om te verstaan wat bv Helpende Hand se direkteur op so Europese toer doen, maar Solidariteit weet darem seker ‘n paar dinge hoe om leiding te gee.

Jaco Kleynhans ·

Beste ‘Disselboom’

Die Oostenrykse Volksparty staan in Duits bekend as die Österreichische Volkspartei en ek gebruik dus met groot gemak in enige skryfwerk in Afrikaans die woord Volksparty. Hoe om dit in Engels te verduidelik is nie hier relevant nie.
Ek moet egter op twee dinge reageer. Eerstens jou ongegronde bewering dat Sebastian Kurz ‘n ‘jong snuiter met ‘n liberale lewenstyl’ is. Kurz is tereg die jongste regeringsleier in die wêreld, maar hy het na Sondag se verkiesing twee verkiesingsoorwinnings agter die blad. Hy het ook ‘n baie suksesvolle 18 maande as kanselier van Oostenryk gedien. Die oorgrote meerderheid van konserwatiewe Oostenrykers het vir sy party gestem. Ek het al meermale Oostenryk besoek en moet sê dat ek nie die Oostynrykse kiesers se oordeelsvermoë so swak sal reken soos wat jy doen nie.
Belangriker wil ek egter oor die Solidariteit Beweging se internasionale skakeling reageer. Die Beweging het ‘n deeglike skakelstrategie. Ons skakel met verskeie partye, leiers en instellings in baie lande en in Oostenryk skakel ons ook met verskeie partye.
Die doel van ons skakeling is bewusmaking van dinge in Suid-Afrika, steunwerwing vir onder andere internasionale politieke druk en derdens direkte steun deur fondswerwing, ens.
Hoekom was ek en drie kollegas dan by Kurz se oorwinningstoespraak Sondag? Omdat sy party ‘n nuwe regering gaan vorm en hy die kanselier gaan wees. Dit is in belang van ons lede en ondersteuners dat ons sterk bande in Oostenryk smee en sterk steun daaruit ontgin.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.