Mark Sheehan, medestigter en kitaarspeler van die Ierse rockgroep The Script, is oorlede.
Die 46-jarige Sheehan is Vrydag in ʼn hospitaal oorlede ná ʼn kort siekbed, het die musiekgroep op sosiale media aangekondig.
Sheehan, sanger Danny O’Donoghue en dromspeler Glen Power het in 2001 die musiekgroep begin.
Volgens ʼn plasing op sosiale media was Sheehan “ʼn geliefde eggenoot, pa, broer, musiekmaat en vriend”.
Aanhangers word versoek om die privaatheid van sy familie en medemusikante te respekteer.
Ierland se president Michael D Higgins het Sheehan as ʼn “uitstekende voorbeeld van Ierse musikale sukses op die wêreldverhoog” beskryf.
The Script het ses nommer 1-albums in die Verenigde Koninkryk geniet en in die VSA het een van hul albums die topdrie gehaal.
Sheehan is op 29 Oktober 1976 in Dublin gebore. Hy laat sy vrou Reena Sheehan en drie kinders agter.
Hy was ʼn sanger, liedjieskrywer en kitaarspeler.
The Script se eerste album, “We Cry”, het die topposisie in Ierland en die Verenigde Koninkryk gehaal. Hul volgende drie albums, “Science & Faith”, “#3” en “No Sound Without Silence” was ook treffers.