Vrou dood in ystervarkie-eetkompetisie

Argieffoto ter illustrasie. 

’n Vrou is dood nadat sy aan ’n ystervarkie (lamington) verstik het gedurende ’n ystervarkie-eetkompetisie in Australië. Dié land het Sondag Australiëdag gevier en die ystervarkie, sponskoek gedoop in sjokoladestroop en klapper, is die land se nasionale koek.

CNN berig die kompetisie is Sondag by ’n hotel in die kusdorp Hervey Bay in Queensland aangebied op die openbare vakansiedag wat reg oor die land gevier is.

BBC berig deelnemers het mekaar die stryd aangesê om te kyk wie die meeste ystervarkies kan eet, toe die vrou (60) luidens berigte skielik ’n toeval gekry en verstik het.

Dit terwyl deelnemers onder luide applous van omstanders die een na die ander ystervarkie verorber het.

Personeel en veiligheidswagte van die hotel het die vrou te hulp gesnel en noodhulp op haar toegepas, voordat sy na die Hervey Bay-hospitaal gehaas is. Hier het sy later gesterf.

Eetkompetisies is ’n gewilde aktiwiteit tydens Australiëdag, ’n nasionale vakansiedag wat die koms van die eerste Europeërs na Australië herdenk.

Deelnemers aan dié kompetisies wen gewoonlik pryse vir die eet van soveel moontlik koeke, pasteie, worsbroodjies of ander kos binne ʼn vasgestelde tyd.