Opgestel deur die Podlitiek-span
As jy alleen in die donker sit en wonder hoe om die volgende twee uur om te kry, is hierdie week se Podlitiek die ideale manier om minstens ʼn kwart daarvan verby te kry. In hierdie week se episode bespreek Paul en Daniël die situasie wat tans by Eskom heers, asook die skep van koalisies ná die afgelope munisipale verkiesing.
In terme van Eskom kan min Suid-Afrikaners stry dat dinge nou handuit ruk. Met meer donker as lig in baie dele van die land is daar diegene wat versoek dat Andre de Ruyter, hoof van Eskom, en Pravin Gordhan, minister van openbare ondernemings, die trekpas kry en dat daar vir iemand anders ʼn kans gegee word om dinge te probeer regruk. Dan is daar diegene wat vra of De Ruyter werklik genoeg tyd gehad het om die skip om te draai.
Volgende word koalisies bespreek, ʼn nuwe rat wat tot die Suid-Afrikaanse politieke enjin toegevoeg is in die afgelope week. Skielik is daar meer as 60 munisipaliteite waar partye nou maatjies op die speelgrond moet maak met mense en groepe wat nog onlangs in kleurvolle taal afgekraak is. Wat kan Suid-Afrikaners van hierdie nuwe stukkie realiteit te wagte wees? Luister gerus na die Podlitiek-paneel se menings hieroor.
Podlitiek lewer nie die nuus nie, hulle maak dit. Luister Podlitiek.
- Die Podlitiek-span bestaan uit Ernst van Zyl (AfriForum), Paul Maritz (Solidariteit) en Daniël Eloff (Hurter Spies Ing.).
Daniël, ek weet nie of Pretoria uitgesorteer is nie… BAIE hoë munisipale heffings in ruil vir wisselvallige dienslewering – ek sien nie die groot lig na die ANC bewind nie.
Nog minder on DA bewind.