Opgestel deur die Podlitiek-span
Podlitiek is terug en dié week gesels die span oor Suid-Afrika se jongste lening aan Kuba en die hofsaak teen Julius Malema oor die afvuur van ʼn aanvalsgeweer. Die derde deel van die Zondo-kommissie se verslag kom ook onder die loep.
Kuba is natuurlik ʼn historiese bondgenoot van die ANC, maar die vraag is nou: Vir hoe lank sal Suid-Afrika nog die ANC se dankbaarheid vir hulp in die 1980’s moet dra? Die ANC wil graag ʼn bedrag van R50 miljoen aan Kuba oorbetaal, en die Podlitiek-span wonder hardop hoe mens geld leen om dit weg te gee.
Die tweede onderwerp is die hoofbevindings van die Zondo-kommissie se derde verslag wat onlangs verskyn het. Min. Gwede Mantashe word beskuldig van dinge wat vir die gewone Suid-Afrikaner alte bekend sal lyk, en oudpres. Jacob Zuma word ook weer genoem. Podlitiek wonder wel wat nou van al hierdie beskuldigings sal kom.
Malema het in 2018 tydens sy party se vyfde verjaardagviering ʼn outomatiese masjiengeweer afgevuur en word tans deur AfriForum voor die hof gedaag hieroor. Gelukkig vir Podlitiek is AfriForum se prokureur sommer self in die ateljee om alles en nog wat hieroor te vertel.
Podlitiek lewer nie nuus nie, hulle maak dit. Luister Podlitiek.
- Die Podlitiek-span bestaan uit Paul Maritz, Daniël Eloff (Hurter Spies Ing.), Ernst van Zyl (AfriForum) en Frederik van Dyk.
Weet die IMF dat hul lening aan ons na Kuba deurgestuur word?