Makadamiaskywe (Foto: Lapa-uitgewers)
Dié skyfies is heerlik vir ʼn kosblik!
Lewer 24 porsies
Bestanddele
- 200 g (335 ml) koekmeel
- 40 g (5O ml) versiersuiker
- 120 g (125 ml) koue botter, in blokkies gesny
- 1 eiergeel
BOLAAG
- 125 g (130 ml) botter, in blokkies gesny
- 65 g (100 ml) bruinsuiker
- 100 ml heuning
- 250 g makadamianeute, gekap
Metode
- Voorverhit die oond tot 180 °C. Spuit ’n vlak, vierkantige 23 cm-pan met kleefwerende kossproei.
- Verwerk die meel, versiersuiker en botter tot dit soos fyn broodkrummels lyk. Voeg die eiergeel by en meng tot die mengsel net bymekaarkom. Bring die deeg bymekaar en druk effens platter. Bedek met kleefplastiek en sit vir minstens 30 minute in die yskas.
- Rol die deeg op ’n meelbestrooide werkvlak uit en druk liggies in die pan vas. Sny die deeg wat oorhang met ’n skerp mes af. Voer die pan met bak- of waspapier, vul met boontjies of rys en bak blind vir 15 minute. Haal uit, verwyder die gevulde papier en bak vir nog 5 minute.
- BOLAAG
- Meng intussen die botter, bruinsuiker en heuning in ’n kastrol oor ’n matige hitte. Roer tot die suiker opgelos is en laat vir 4-5 minute prut. Voeg die neute by en meng goed.
- Gooi die neutmengsel oor die deeg en bak vir nog 12-15 minute. Laat in die pan afkoel en sny in eweredige blokke.
Bron: Lekker & vinnig: Lekkers (Uit: Rooi Rose Versamelresepte, Vickie de Beer)
Uitgewer: Lapa
