Rafael Nadal. Foto: Twitter.
Daar is minder tennis in 2020 as in ander jare gespeel, maar Rafael Nadal verbeter steeds die een rekord na die ander. Hy het onlangs sy 13de titel op Roland Garros gewen, terwyl hy ’n rukkie daarna in sy 1 000ste wedstryd op die tennisbaan koning gekraai het.
Nou het die 34-jarige Spanjaard ook Jimmy Connors se rekord verbeter vir die meeste agtereenvolgende weke onder die wêreld se tien top-spelers.
Die Amerikaner was vir 789 weke deel van hierdie elite groep, maar Nadal het dit nou ’n trappie verder geneem: Vir ’n verstommende 790 weke was hy onder die wêreld se tien beste spelers.
En as sy spelpeil vir die volgende paar jaar hou en hy die beseringspook kan vryspring, kan hierdie rekord nog vir jare agter sy naam staan.
Nadal het in 2005 die eerste keer sy top 10-deurbraak gemaak en hy het stelselmatig vir Pete Sampras, Ivan Lendl, Roger Federer en nou vir Connors verbygesteek.
“Dit beteken eintlik net dat ek ’n ou man is,” het hy geskerts nadat hy sy 1 000ste wedstryd teen Feliciano Lopez gewen het.
“Maar dit beteken ook dat ek oor ’n lang tydperk goeie tennis gespeel het. En dit is iets waarvoor ek baie dankbaar is; dit is ’n spesiale oomblik.”
Spelers wat die langste onder die wêreld se tien top-spelers getel het, is:
Rafael Nadal: 790 weke
Jimmy Connors: 789 weke
Roger Federer: 734 weke
Ivan Lendl: 619 weke
Pete Sampras: 565 weke
om net meer as 15jaar onder die top 10 te wees, moet gedoen word
Go Rafa!!!! Jy is ‘n yster en dis ‘n groot voorreg en plesier om na jou wedstryde te kyk!