ʼn Rekord van 15 wedrenseges en 454 punte op die jaerspunteleer; ja-nee, Max Verstappen het vanjaar omtrent stof in die oë van sy teenstanders geskop.
En volgens Nico Rosberg sorg die Red Bull-ster se indrukwekkende getuigskrif dat hy reeds onder die beste renjaers nóg tel.
“Hy is doodeenvoudig ongelooflik agter die stuur van sy renmotor. Ek dink dit is maklik om te sê dat hy op koers is om een van die grootste renjaers nóg te word. Goeiste, as ʼn mens na sy statistieke kyk, skuur hy eintlik nou al skouers met die bestes,” het die voormalige wêreldkampioen in ʼn onderhoud met Sky Sports gesê.
Die geruite vlag is reeds 35 keer in Verstappen se loopbaan vir hom geswaai en hy is sesde op die lys vir die meeste seges nóg.
Om dié statistieke vinnig in perspektief te plaas – hy spog met meer oorwinnings as F1-legendes soos Niki Lauda, sir Jackie Stewart en Nigel Mansell, terwyl Ayrton Senna en Alain Prost se rekords beslis in sy visier is.
Rosberg meen dat die 25-jarige Nederlander ook met sy veggees en veerkragtigheid beïndruk het – veral toe Ferrari in die aanloop tot die seisoen die spoedsepter geswaai het.
“Die Ferrari’s was verreweg die vinnigste motors aan die begin van die seisoen, maar Max kon steeds daarin slaag om wedrennne te wen. Hy het 146 punte meer as enigiemand anders op die jaerspunteleer en dit is beslis een van die beste individuele pogings wat ons waarskynlik ooit sal sien.”
Meeste F1-loopbaanseges:
- Lewis Hamilton 103
- Michael Schumacher 91
- Sebastian Vettel 53
- Alain Prost 51
- Ayrton Senna 41
- Max Verstappen 35
- Fernando Alonso 32
- Nigel Mansell 31
- Jackie Stewart 27
- Jim Clark en Niki Lauda 25
1️⃣5️⃣
An amazing way to end an incredible season for us @redbullracing & @HondaRacingGLB.
All in all, the whole season has been unbelievable and it’s been very enjoyable with the team. Thank you so much to everyone for your hard work ???? pic.twitter.com/nsUP2qhOIj
— Max Verstappen (@Max33Verstappen) November 20, 2022
Hy moet nou net aan sy eie reg werk en ‘n goeie leier ook word.