Die bepalings vir die Australiese Ope is bekend en Rafael Nadal sal hom vir ʼn Britse aanslag moet staal wanneer hy teen Jack Draper in sy openingswedstryd te staan kom.
Die 21-jarige Draper speel juis môre in die halfeindstryd van die Adelaide International 2-toernooi en hy het al met ʼn paar toptienspelers in sy jong loopbaan afgereken.
“Dit sal ʼn wonderlike ervaring wees om teen Rafa te speel; hy is ʼn kampioenspeler. Ek is nog jonk en ek wil baie graag op my beste teen hom wees,” het die Brit gesê.
Nadal is die verdedigende kampioen nadat hy verlede jaar met Daniil Medvedev in vyf stelle afgereken het.
Intussen is Novak Djokovic en Nick Kyrgios op koers om koppe in die kwarteindstryd van die toernooi te stamp. Hul vertoonwedstryd môre op die Rod Laver-baan kan dus die perfekte littelosmaker wees.
G'Day Novak ????
The nine-time #AusOpen champion is ready to rock ????@DjokerNole • #AusOpen • #AO2023 pic.twitter.com/qQLzAWwBwX
— #AusOpen (@AustralianOpen) January 12, 2023
Djokovic – wat reeds nege keer met die trofee in Melbourne geglimlag het – begin sy veldtog teen Roberto Carballes Buena; ʼn speler met wie hy op ʼn drafstap tydens die Amerikaanse Ope-toernooi in 2019 afgereken het.
Indien die Serwiër vir die tiende keer met die louere sou wegstap, sal dit die 22ste Grand Slam-titel van sy loopbaan wees.
In ʼn ander lekker eersterondewedstryd sal Andrey Rublev teen Dominic Thiem te staan kom.
Thiem, wat ʼn paar jaar terug die Amerikaanse Ope-titel ingeoes het, sukkel deesdae gereeld met beserings en hy het nou as ʼn promotorskeuse sy pad na Melbourne gevind.
Die aksie begin amptelik op 16 Januarie.
- Eersteronde-bepalings (topgekeurde spelers):
Rafael Nadal (1) teen Jack Draper
Casper Ruud (2) teen Tomas Machac
Stefanos Tsitsipas (3) teen Quentin Halys
Novak Djokovic (4) teen Roberto Carballes Buena
Andrey Rublev (5) teen Dominic Thiem
Felix Auger-Aliassime (6) teen Vasek Pospisil
Daniil Medvedev (7) teen Marcos Giron
Taylor Fritz (8) teen Nikoloz Basilashvili
Holger Rune (9) teen Filip Krajinovic
Hubert Hurkacz (10) teen Pedro Martinez