(Foto verskaf deur SPAR)
SPAR, in vennootskap met Telkom, bied met trots die Netbal-wêreldbeker Fan Park aan, ʼn opwindende geleentheid wat op 6 Augustus by SuperSport Park in Centurion sal plaasvind.
Retha Ingenbleek, borgskap-kontroleur van SPAR North Rand, en Peggy de Bruin, LUR vir ekonomiese maatskaplike ontwikkeling, sal ook hul ondersteuning bied en hul entoesiasme verleen aan dié opwindende byeenkoms.
“Ons is verheug om deel te wees van die Netbal-wêreldbeker Fan Park,” sê Ingenbleek. “Hierdie geleentheid bring netbal-aanhangers uit alle oorde en sal ʼn ongelooflike platform bied om die sport te vier. SPAR was nog altyd daartoe verbind om vrouesport te ondersteun en gemeenskappe te bemagtig. Hierdie Fan Park strook perfek met ons waardes. Ons sien uit na ʼn dag vol netbal-aksie en onvergeetlike gesinspret.”
De Bruin is ook opgewonde oor die byeenkoms. “Die Netbal-wêreldbeker Fan Park is ʼn uitstekende inisiatief wat die talent en toewyding van ons netbal-atlete tentoonstel, en ook dien as ʼn katalisator vir gemeenskapsontwikkeling. Ons is trots daarop om deel te wees van dié geleentheid. Deur die opbrengs te herbelê in plaaslike netbal-inisiatiewe, sal ons talent bevorder, jong atlete bemagtig en ʼn bydrae lewer tot die uitbouing van die sport in Pretoria. Ons moedig elkeen aan om by ons aan te sluit vir dié merkwaardige viering van netbal.”
Koop jou kaartjies
Kaartjies na die Fan Park kan aanlyn teen slegs R20 per persoon aangeskaf word. Toeskouers gaan bederf word met ʼn dag van ongelooflike vermaak en sodoende ʼn bydrae lewer tot die ontwikkeling van die Tshwane-netbalgemeenskap. Die opbrengs word herbelê in plaaslike netbal-inisiatiewe.
Gesinspret
Die Netbal-wêreldbeker Fan Park waarborg ʼn prettige dag vir die hele gesin. Met opwindende netbalwedstryde wat op yslike skerms uitgesaai word en ʼn groot reeks aktiwiteite en vermaak, sal daar iets vir elkeen wees om te geniet. Maak nie saak of jy ʼn absolute netbal-verslaafde is of bloot op soek is na ʼn prettige uitstappie nie. Dié geleentheid beloof ʼn onvergeetlike ervaring vir elkeen.
Fan Park
Die hekke maak om 09:00 oop en sal aanhangers verwelkom in ʼn opwindende atmosfeer. Daar sal verskeie aktiwiteite beskikbaar wees.
Bly op hoogte
Bly op hoogte deur die Fan Park se amptelike sosialemediabladsye dop te hou.
Webwerf: netballworldcupfanpark.co.za
Facebook: https://www.facebook.com/VitalityNetballWorldCupFanPark/
Instagram: https://www.instagram.com/vitalitynetballworldcupfanpark/
Ons nooi elkeen
(Foto verskaf deur SPAR)
SPAR se missie is om die Netbal-wêreldbeker Fan Park die grootste en beste aanhangerspark in Suid-Afrika te maak. Dit is ʼn besonderse geleentheid om jou ondersteuning te wys vir vrouesport, gemeenskapsbetrokkenheid en die gees van netbal.
Kom ons skep ʼn buitengewone ervaring vir aanhangers, gesinne en netbal-entoesiaste reg oor Suid-Afrika.
