Die Springbokke het gisteraand die Wêreldbeker-gasheerland in sy hoofstad uitgeskakel toe hulle vir Frankryk in ʼn aksiebelaaide kwarteindstryd met 29 – 28 op die Stade de France geklop het.
Daar is talle helde in die Suid-Afrikaners se uitstekende vasbyt-triomf: Franco Mostert het ʼn spul Fransmanne in hul spore gestuit, Eben Etzebeth het ʼn baie goeie wedstryd gehad en Cheslin Kolbe het waarskynlik een van sy beste vertonings nóg in ʼn Springbok-trui gelewer.
Die 29-jarige vleuel het nie net ʼn drie gedruk nie, maar sy stelskop-afstormsessie het vir Thomas Ramos onder druk geplaas én ʼn deurslaggewende rol in die uiteinde van die wedstryd gespeel.
Suid-Afrika het vir sy sesde Wêreldbeker-halfeindstryd gekwalifiseer en die span is op koers om sy Webb Ellis-titel te verdedig.
Kom ons almal hou duim vas dat beurtkrag Saterdag afgelas word. Die Springbokke speel immers om 21:00 teen Engeland op die Stade de France.
Four years in the making… #RWC2023 pic.twitter.com/UA4WWX7M7J
— Rugby World Cup (@rugbyworldcup) October 15, 2023
Uitslae:
Argentinië 29 – 17 Wallis
Nieu-Seeland 28 – 24 Ierland
Engeland 30 – 24 Fidji
Suid-Afrika 29 – 28 Frankryk
Halfeindstryd-bepalings:
Vrydag: Nieu-Seeland teen Argentinië om 21:00
Saterdag: Suid-Afrika teen Engeland om 21:00.
All roads lead to the Webb Ellis Cup#RWC2023 pic.twitter.com/gBbuY4WJIK
— Rugby World Cup (@rugbyworldcup) October 15, 2023
Ek is verras deur die Man van die wedstryd. Etsebeth het briljant gespeel maar sou ek dink Kolbe was die speler wat die grootste impak gehad het. Die afstorm van die doelskop was mynsinsiens die bepalende faktor in ons wen gewees.
Kobus – wie was “Man of the Match?” asseblief.
‘Bongi’ Mbonambi
Dankie
Die Engelse behoort nie ‘n harde neut te wees nie, gesien in die lig van hulle getsjommel teen Fidji. Dit het vir my gelyk of hulle veel eerder wou verloor. Ongetwyfeld die swakse kwarteind die naweek.
Dit sal fataal wees om te gerus teen Engeland te wees.