Springbokke (weer) beroof, maar neerlaag was hul eie skuld

Ivan van Zyl laat loop die bal in die toets teen Engeland.([email protected])

Daar gaan nog baie lank gestry word en woede en bitterheid wees oor die Australiese skeidsregter, Angus Gardiner.

Hy is nou ook met reg saam met Bryce Lawrence (Nieu-Seeland) en die Fransman Romain Poite (en heelwat ander blasers) in byna elke Suid-Afrikaner se swart boekie.

Dit het gevolg nadat Engeland Saterdag op Twickenham die toetswedstryd teen die Springbokke met 12-11 gewen het nadat Suid-Afrika rustyd met 8-6 voor was.

Hoekom is Gardiner vyand nommer een?

Gardiner het gefouteer nadat die Engelse losskakel, Owen Farrell, met speeltyd verstreke, die Springbok-plaasvervanger André Esterhuizen blatant met die skouer geloop het sonder om sy arms te gebruik.

Engeland was met 12-11 voor en as die Bokke die strafskop oorgeskop het, sou hulle die kragmeting gewen het.

Maar Gardiner het  in die 82ste minuut die duikslag op aanbeveling van die lynregter eerder na die televisieskeidsregter, Olly Hodges, verwys. Nadat die voorval op die groot skerm dopgehou is, het Gardiner besluit dat daar nie genoegsame bewyse vir ʼn strafskop was nie.

Werklik?  Wat anders is ʼn blatante skouerloop dan as ʼn strafskop?

Gardiner het eerder die eindfluitjie geblaas en die Engelse was op hul voete; die Bokke op hul knieë.

♦ Is die Springbokke geboor? Beslis, maar dan was dit darem ook hul eie skuld dat hulle verloor het.

Hulle het die eerste helfte heeltemal oorheers en moes die Engelse toe al die doodskoot gegee het, veral nadat die Engelse slot Maro Itoje vroeg al met ʼn geelkaart gestraf is.

Hoe op dees aarde kon die Bokke nie afrond nie? Engeland was dan in die hele eerste helfte letterlik nie een keer in die Bokke se kwartgebied nie?

Hulle is in die skrums vermorsel, hul verdediging was baie broos, hulle was plan- en futloos, byna uit op hul voete.

Ek ys om te dink wat aanstaande week sal gebeur as die All Blacks in dieselfde posisie geplaas sal word … arme Engelse!

Maar was dit dalk ook nie deel van hul wedstrydplan om terug te hang en te hoop dat die Bokke hulself sou uitbrand nie?

As dit waar is, het dit gewerk.

In die tweede helfte is die rolle omgeruil en Engeland was toe die beste span, hoewel hulle steeds bitter gelukkig was om te wen.

Swartskape? Kom ons begin voor by die wêreld se beste haker, Malcolm Marx, wat weer met sy ingooiwerk gesukkel het.

Hoe kon die Bokke vier lynstane verloor het (drie in die eerste helfte en op die aanval ) en besit afgestaan het, veral nadat die Engelse verskeie kere nie eens in die lynstane meegeding het nie?

Wat ook van die bottervingers van voor- en agterspelers, en wat van die skrum diep in die tweede helfte toe Engeland die eerste keer in dié faset oorheers het en die Bokke gestraf is?

Dit het tot Farrell se derde strafdoel gelei nadat Elliott Daly ook met ʼn lang strafdoel geslaag het.

Verlore kanse, en daar betaal die Bokke toe die dure prys.

Is daar lesse te leer? Ja, dit help nie jy hou die All Blacks in toom nie, maar val vas teen die Engelse, Argentynse Poemas en die Wallabies nie.

Bestendigheid, dis wat ons vra (ook deur die skeidsregters).

Puntemakers ‒
Engeland (6) 12:
Strafdoele: Owen Farrell (3). Elliott Daly.
Suid-Afrika (8) 11: Drie: Sbu Nkosi. Strafdoele: Handré Pollard

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

45 Kommentare

jongste oudste gewildste
Swartwolf

Ag asseblief stop die “victim mentality” van ons is beroof. Dis ‘n wedstryd op ‘n silwer skinkbord aan England gegee. Halftyd toe slaap die voorspelers. En England kry die momentum vorentoe. Sien die game vir wat dit was. ‘N Sirkus.

gds

whitely, faf. janjies – dis die kombinasie wat kort. speel pollard op 12 – dis die resep

Johann

Kyk as daar een ding is wat ons mee goed is, is dit verskonings en ja maar en en en. Veral as dit kom by WEER verloor!

Wesley

Eintste ons eie skuld. Ons domineerende voorpak het niks gedoen wat uitgestaan het nie. Marx was swak op die lynstane en niks bal in die los gewen nie. Dit gaan sy kans om speler van die jaar te wees baie seer maak. Uitstaande was ons agter driehoek onder die hoee bal, die ding wat almal so oor bekommerd was. Waar ons moes domineer en die wedstryd wen het ons gefalter. Eina manne eina

All Black

Siestog. Die ou bokkies sal altyd iets kry om oor te kla. Verskonings, verskonings. Due kwota spannetjie rook nie die pyp nie, dis al. Gebruik eerder kwotas as die regge verskoning. Om heeltyd te kla oor refs en spelers is swak sportmangees