Foto: (AP Photo/Manu Fernandez)
Tennis:
- Twee Spanjaarde, Rafael Nadal en Roberto Bautista Agut, het vir Kanada met 2 – 0 in die Davisbeker-finaal geklop om sodoende dié Europese land se sesde titel in te palm.
Bautista Agut, wie se pa Donderdag oorlede is, het in die eerste wedstryd met Félix Auger-Aliassime afgereken. Die eindtelling was 7 – 6 en 6 – 3.
Daarna het Nadal in ’n aksiebelaaide stryd met Denis Shapovalov klaargespeel. Hoewel die Kanadees moedig baklei het, was die telling 6 – 3 en 7 – 6 in Nadal se guns en dit was glad nie nodig om die dubbelspelwedstryde te speel nie.
Dit was Kanada se eerste proesel van ’n Davisbeker-eindstryd, terwyl dit die sesde keer is dat Spanje met die louere wegstap. Hulle steek ook die wentjek van $2,1 miljoen in hul sakke.
Rugby:
- Faf de Klerk se Sale Sharks-span het vir La Rochelle 25 – 15 in die Europese Kampioenskapsbeker geklop.
- Dan het Montpellier vir Gloucester met 30 – 27 getroef. Handré Pollard was egter nie deel van die aksie nie, aangesien hy nog van sy wangbesering herstel.
Krieket:
- Die voormalige Klerksdorper, Marnus Labuschagne, het sy eerste toetshonderdtal vir Australië op die Gabba geslaan.
Die 25-jarige het 185 lopies geslaan in Australië se spogsege van ’n beurt en vyf lopies teen Pakistan.
- Nóg ’n Suid-Afrikaanse uitvoerproduk, die Kiwi Neil Wagner, het ook amok onder die Engelse kolwers gemaak.
Dié oud-Affie het 5/44 in die tweede beurt van die eerste toets teen die Engelse geneem en het ’n groot rol in die Nieu-Seelanders se oorwinning van ’n beurt en 65 lopies gespeel.
