Foto’s: Musiek, fliekvermaak by Maroela Media se fliekpiekniek

(Foto: Verskaf.)

Oud en jonk het Saterdag luilekker uitgespan by Maroela Media se fliekpiekniek wat by Monte De Dios in die ooste van Pretoria aangebied is.

Te midde van die Covid-19-pandemie het fliekgangers hul komberse gesprei en aan happies gesmul wat deur Monte de Dios se restaurant Cara Bella voorberei is.

Terwyl besoekers hul sitplekke in die amfiteater ingeneem het, het Franja du Plessis en Jak de Priester gesorg vir heerlike Afrikaanse musiekvermaak.

Susan Lombaard en Luan Jacobs by Maroela Media se fliekpiekniek (Foto: Esté Meyer Jansen/Maroela Media)

Franja het die dag afgeskop met liedjies soos “Ek wil lewe” en “Kaalvoetkinders” en Jak het gehore vermaak met van sy gewilde treffers waaronder “Sally Williams”, “Hugo, bel die polisie” en “Sny dit af”.

Fliekgangers het teen 17:00 reggeskuif vir Dominee Tienie en om 19:00 is die immergewilde Katinka Heyns-rolprent Die storie van Klara Viljee vertoon.

Luan Jacobs, wat die rol van die predikantseun in Dominee Tienie vertolk, was die gasheer van die geleentheid.

Jak de Priester in aksie by Maroela Media se fliekpiekniek (Foto: Esté Meyer Jansen/Maroela Media)

“Dit is verfrissend om weer uit te kom en geleenthede by te woon,” sê Luan. “As kunstenaar het dit amper gevoel asof ek weer by die huis is.”

Susan Lombaard, uitvoerende hoof van Maroela Media, sê dit was vir dié mediahuis belangrik om ʼn geleentheid te skep vir mense om in die oop lug en in Afrikaans te kuier. Sy voeg by dat dit ook van uiterste belang is om die Afrikaanse vermaakbedryf te ondersteun.

“Maroela het groot waardering vir Afrikaanse kunstenaars en die vermaakbedryf. Die fliekpiekniek was die perfekte geleentheid om saam te kuier én die bedryf te ondersteun.”

Lombaard doen ʼn beroep op lesers om kunstenaars te ondersteun wanneer hulle die geleentheid het om dit te doen.