Dit gebeur nie aldag dat Jan Alleman die kans kry om informeel saam met ʼn bekroonde kamerkoor soos Vox Chamber Choir te sing nie.
Daarom is dié koor se saamsinggeleentheid op 19 April in Pretoria ʼn wonderlike manier vir musiekliefhebbers en aanhangers om musikale samesyn saam met Vox Chamber Choir te ervaar.
“Ons noem dit die Vox Bar Choir, en almal ouer as 18 kry die geleentheid om saam musiek te maak terwyl ons gesellig kuier. Jy hoef geen oudisie af te lê nie en niks voor te berei nie,” verduidelik koororganiseerder Andries Brümmer.
Vox Chamber Choir het dié gemeenskapsprojek in 2018 begin, en hulle hou sedertdien gereeld informele saamsinggeleenthede in Kaapstad en Pretoria. Die konsep behels dat lede van die publiek op die aand elkeen ʼn stuk bladmusiek ontvang waarna dit in ʼn gesellige omgewing geoefen en later gesing word.
“Ons gaan hierdie keer die liedjie ‘Paradise Road’ sing. Sodra almal die musiek onder die knie het, gaan ons dit sing en sommer ʼn video-opname ook daarvan maak,” voeg Brümmer by.
Franco Prinsloo, dirigent van die Vox Chamber Choir, sal gereed staan om die musiek vir die verskillende stemgroepe aan te leer. Die resultaat is ʼn veelstemmige koor wat in ʼn kroeg saamsing.
“Dit gee my altyd hoendervleis om mense so te sien saamkom en saamsing. Hulle het altyd soveel hoop en is boonop uiters passievol,” het Prinsloo in ʼn vorige onderhoud met Maroela Media gesê.
Die koor gaan op Vrydag 19 April om 18:00 by Moonshot Café in Pretoria met hulle Vox Bar Choir-aanbieding wees. Kaartjies vir die geleentheid kos R80 en kan by Tixsa bespreek word.
Kyk hier na ʼn lusmaker van Vox Chamber Choir se vorige saamsinggeleentheid wat in Kaapstad aangebied is:
Wow, dit is ‘n besonderse geleentheid.