Verna Vels se geliefde fiktiewe karakter Liewe Heksie is terug. Dié keer span sy haar besem in as ’n visstok, maar “haai, oe, Blommie”, dit sukkel maar om ’n vis te laat byt.
Boonop raak Koning Rosekrans se forelle minder. Is Levinia die skuldige of is die nare Geelheks ook weer in die prentjie?
Margit Meyer-Rödenbeck klim terug in dié bekende karakter se skoene vir Liewe Heksie vang vis en gaan haar aas tussen Mei en August vir opvoerings reg oor die land uitgooi.
Deon van Zyl sluit by Meyer-Rödenbeck aan in die rolle van Karel Kat, die Geelheks en Koning Rosekrans.
Dié unieke vertonings beloof om klein én groot kaboutervriende van “Menseland” te boei danksy prettige gehoordeelname en voortsnellende aksie.
In 2022 het dié span die ABSA KKNK Kanna-toekenning ontvang vir beste kinderteaterproduksie en is in 2023 genomineer vir ʼn Fleur du Cap-toekenning.
Liewe Heksie is ʼn karakter wat Meyer-Rödenbeck ook baie na aan die hart lê.
“Verna Vels het ʼn juweel van ʼn karakter geskep. Nie net Heksie nie, ander karakters ook. Sy het die spyker absoluut op die kop geslaan, en was haar tyd ver vooruit. Heksie is humoristies. Haar vergeetagtigheid maak haar geliefd en menslik, kinders kan hulle identifiseer daarmee,” het sy vroeër aan Maroela Media vertel.
Koop vandag nog jou kaartjies vir Liewe Heksie vang vis:
- 6 Mei by Atterbury Teater, Pretoria: 10:00 en 12:00
- 7 Mei by Etienne Rousseau Teater, Sasolburg: 14:00
- 20 Mei by Die Koelkamers, Paternoster: 10:00 en 12:00
- 3 Junie by The Drama Factory, Kaapstad: 10:00 en 12:00
Kyk ook uit vir hierdie vertonings:
- 10 Junie by Curro Durbanville Hoërskool
- 23 en 24 Junie by Huisgenoot Kinderfees, Johannesburg
- 12 Augustus by Kalfiefees, Sandbaaisaal, Onrus
- 26 Augustus by Welgemoed Kunstefees, Bellville
Dié tannie se rakleeftyd is al lankal verby!