Suid-Afrikaanse teatermakers is tydens vanjaar se Momentum Beleggings Aardklop-kunstefees in Potchefstroom vereer.
Kunstenaars wat tydens die kunstefees se jaarlikse toekenningsfunksie pryse ingepalm het, sluit onder andere Dawid Minnaar, Sandra Prinsloo en Elzabé Zietsman in.
“Ons het ʼn leuse, ʼn missie: ons wil verryk, verras, vermaak en versoen,” het Alexa Strachan, uitvoerende hoof van Aardklop aan Maroela Media gesê.
“Party mense wil net lag en ontspan, ons bied dit vir hulle. Ander mense wil nadink en gekonfronteer word, hulle wil hulself en die foute in ons samelewing raaksien. Ander mense leer weer iets, en staan vir ʼn oomblik in iemand anders se skoene en besef dat hulle vol vooroordeel was.
“Ek dink ons aanbod hierdie jaar was volrond en perfek.”
Kunstenaars soos De Klerk Oelofse, Rolanda Marais, Marion Holm, Edwin van der Walt, Eben Genis, Bettie Kemp, Carla Smith, Antoinette Kellermann, Amanda Strydom, Je-ani Swiegelaar, Desiré Gardner, Ludwig Binge, Gideon Lombard en Joanie Combrinck was tydens die fees op die planke gewees.
Elzabé Zietsman het drie toekennings vir haar musiekproduksie, Femme is fatale ingepalm, terwyl Die moeder met Sandra Prinsloo twee toekennings gewen het en Mirakel met Dawid Minnaar twee.
Hiermee ʼn volledige lys van die wenners:
Beste visuele kunsuitstalling: Tafadzwa Tega: A seed will take it’s time to grow
Beste musiekuitvoering: Elzabé Zietsman in Femme is fatale
Beste byspeler: Eben Genis in Mirakel
Aardklop-hartsvriende se beste produksie: Die moeder
Beste akteur: Dawid Minnaar in Mirakel
Beste aktrise: Sandra Prinsloo in Die moeder
Beste nuutgeskrewe teks: Goed wat wag om te gebeur
Beste musiekgedrewe produksie: Femme is fatale
Beste toneelaanbieding: Die moeder
Beste regisseur: Marthinus Basson vir Mirakel
Beste algehele aanbieding: Femme is fatale
Kyk na Maroela Media se kuier by die toekenningsgeleentheid hier: