Geliefde ‘7de Laan’-akteur gepos

Pierre van Pletzen as Oubaas (Foto: Instagram via Real 7de Laan)

Die Afrikaanse akteur Pierre van Pletzen sal nié meer as Septimus “Oubaas” van Zyl in die SABC2-sepie 7de Laan te sien wees nie.

Sandra Vaughn, Van Pletzen se vrou, het die nuus aan Maroela Media bevestig.

Vaughn sê Van Pletzen het gister na afloop van ʼn kort vergadering gehoor dat sy kontrak nie hernu word nie.

Die akteur het verder ook net ʼn maand kennis gekry, en sal dus net tot 4 Augustus op stel wees.

“Ons is nie seker hoekom nie, dalk wil hulle nie meer vir Oubaas in die sepie hê nie,” sê Vaughn. “Dis fine, ons sal oukei wees. Ek weet die Here voorsien en ons glo dat dinge op die ou end goed sal uitwerk, maar drie maande kennis sou ons darem meer tyd gegee het om voor te berei en om alternatiewe planne te maak.”

Vaughn sê die gesin is nou in ʼn finansiële krisis gedompel en die beëindiging van dié kontrak noop hulle nou om hul huis in die mark te sit.

“Pierre is vir die eerste keer sedert hy ʼn student is, sonder werk. Al die ander projekte waaraan hy gewerk het, is onlangs voltooi. Met dié inkomste wat ook nou weggevat word, noop dit ons om van ons huis ontslae te raak. Ons sien die agent reeds vanaand vir ʼn waardasie; ons wil ten minste ʼn bietjie kontantbuffer hê – mens weet nie hoe lank daar nie werk gaan wees nie.”

Sy sê die gesin is egter vol vertroue dat dinge sal uitwerk.

“Ons is emosioneel, maar ons is nie bitter of iets nie. Daar is nie kwade gevoelens nie. Ons is net bietjie vinnig in die water gegooi, en moet nou leer swem.”

Vaughn sê die gesin moes verlede jaar ook aanpas toe Pierre se vergoeding met byna die helfte gesny is.

“Hulle het laasjaar ook vir hom ʼn nuwe kontrak gegee, wat ons albei genoop het om ander werk te begin doen. So ons is gewoond daaraan om in onbekende situasies te wees. Ons weet die Here gaan voorsien, en daar is altyd ʼn plan met alles. Maar dis tough, daarmee kan niemand stry nie.”

Van Pletzen is sedert 2000 in die sepie te sien as Hilda, vertolk deur Annelisa Weiland, se man.

Rosa-Marie Erasmus, 7de Laan-woordvoerder, wou nie in dié stadium bevestig dat Van Pletzen se kontrak nie hernu is nie. Erasmus sê die SAUK sal binnekort ʼn verklaring in dié verband uitreik.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

121 Kommentare

jongste oudste gewildste
MADISON

Ag nee dis nou ‘n probleem van epidermiese proporsies. Ons gaan hom mis en wens hy het liewer 3 maande kennis gekry. Sterkte oom Oubaas !!!!

MARISKA KRUGER

Dis vreeslik hartseer maar daar moet tog sekerlik ‘n nes eiertjie wees. As jy vir die eerste keer sedert jy ‘n student was sonder werk sit, moet jy darem ‘n goeie pensioen bymekaar he of hoe?

Eish

Tragies om die minste te sê. Dis louter hel om deur die meule gemaal te word. Behou die geloof.

Kobie Nel

Pleks dat hulle daai Viviene pos, sy haat mos witmense. Maar een ding is seker, ek GENIET Piere se spel op Phil 101. Daar is altyd nog ‘n deur wat oopmaak as jy net vertrou en op die uitkyk is. VOORSPOED.

Steven

Die 7de laan skip sink stadig maar seker. Erg vervelige dun storielyn. Pierre sal verseker ander aanbiedinge kry by beter produksies.