Met Maroela Media en kykNET se sepiegids kan jy weekliks ʼn voorsmakie kry van die gebeure in jou gunstelingsepie.
Binnelanders
Weeksdae om 19:30 op kykNET
Maandag 22 Januarie
Liam dreig om te bedank, en Delia wil agter die kap van die byl kom. Uys is die vorige aand in hegtenis geneem, maar kan niks onthou nie. Nicolette moedig vir Steve aan om sy broer op te spoor.
Dinsdag 23 Januarie
Tracy besef Karen het geldelike probleme, en Uys ontdek sy gesteelde kaart is gebruik. Thalia het nog nie haar planne met Louis gedeel nie.
Woensdag 24 Januarie
Karen se penarie raak by die dag erger, en Naomi se vreemde drome pla haar. Uys kry die skok van sy lewe, en Steve verwyt homself omdat hy nie ʼn familielid in nood bygestaan het nie.
Donderdag 25 Januarie
Naomi het vrae en dit maak Louis gespanne. Tertius is beskermend oor Tracy en haar swangerskap, en Uys begin antwoorde kry oor die aand van die ongeluk.
Vrydag 26 Januarie
Thalia ontwikkel ʼn nuwe teorie oor Naomi se nagmerries, en Conrad word onkant betrap deur Nicolette se besluit. Uys onthou iets wat hom dalk kan help om sy onskuld te bewys.
Suidooster
Weeksdae om 18:00 op kykNET en 18:30 op kykNET&kie
Maandag 22 Januarie
Bridgette voel sleg oor hoe sy Laylla behandel het, terwyl Danni ʼn oproep van haar ginekoloog kry. Oos Wes se eerste vasvra-aand neem vreemde wendinge.
Dinsdag 23 Januarie
Bridgette skok JPD se raadslede, terwyl Danni onseker is wat die volgende stap vir haar is. Bianca is opgewonde oor haar afspraak met Aiden, maar is hulle op dieselfde golflengte?
Woensdag 24 Januarie
Laylla en Nazeem se verhouding word op die proef gestel. Brendan laat die Thuli’s groot skrik, en Aiden kry vir Elana voor stok.
Donderdag 25 Januarie
Bianca besluit om meer spontaan te wees, en Nazeem wys sy brose kant. Zoe ervaar erge innerlike konflik, terwyl Siya swaar dra aan ʼn groot geheim.
Vrydag 26 Januarie
Laylla hoor uiteindelik wat sy wil hoor by Nazeem. Carlo roep Angie se hulp in met ʼn projek, terwyl Danni begin dink Siya steek iets vir haar weg.
Diepe waters
Maandae tot Donderdae om 18:30 op kykNET
Maandag 22 Januarie
Gys maak ʼn aankondiging by die klub en ontvang iets wat sy bloed laat kook. ʼn Interessante aandete word beplan, terwyl Jacques vir iemand gaan kuier.
Dinsdag 23 Januarie
Gys en Pam maak planne om die huurooreenkoms te betwis. Die Swarts-kinders rig ʼn spesiale versoek aan Sanet. ʼn Komplot teen Gys neem ʼn nuwe wending.
Woensdag 24 Januarie
Boniswa konfronteer Gys met moeilike vrae. Ben wonder oor Rossouw, en Rose is geskok wanneer sy uitvind wie Zelda se prokureur is.
Donderdag 25 Januarie
ʼn Skokkende wending vind plaas tussen Sandra en Zelda. Daar is ʼn kinkel in die stryd oor die Swarts-woning. Sanet probeer aanpas met Rossouw.
Arendsvlei
Maandae tot Donderdae om 19:30 op kykNET&kie
Maandag 22 Januarie
Die Foster-huishouding is in flarde ná Janice se skokbesluit. Abigail probeer om saam met haar vriende uit te hang. Birdy reik uit na Nicolene.
Dinsdag 23 Januarie
Desmond onderbreek die skoolbyeenkoms met ʼn aankondiging. Kyle ontmoet vir Beatrice in die park vir ʼn laatmiddagpiekniek.
Woensdag 24 Januarie
Thys en Bianca moet noodgedwonge by Beatrice intrek. Judy is bekommerd oor Abigail se gemoedstoestand. Lionel gaan soek vir Janice en kom in die moeilikheid.
Donderdag 25 Januarie
Desmond maak ʼn onverwagte aankondiging by die skool. Birdy is die slagoffer van ʼn aggressiewe misdaad. Abigail plaas haarself in onnodige gevaar.