Zeus op pad huis toe (Foto: KCHA, Facebook)
Dit was die reis van ʼn leeftyd toe 15 vrywilligers gehelp het om ʼn hond duisende kilometer te vervoer om hom weer met sy gesin te herenig.
Zeus, ʼn pit bull, behoort aan ʼn enkelma en haar twee dogters wat in Butte, Montana woon. ʼn Vriend van die gesin het hom glo gesteel toe hy hulle twee maande gelede besoek het.
Die vriend, wie se naam nie bekend gemaak is nie, is later in Charleston, Wes-Virginia, in hegtenis geneem en Zeus is na ʼn skuiling in die stad gebring.
Die Kanawha-Charleston Humane Association het ontdek dat Zeus met ʼn mikroskyfie toegerus is en bevind dat sy huis 3 200 km ver is in Montana. Volgens die organisasie het die familievriend die ma en haar dogters aan die einde van Oktober besoek. “Hy het egter misbruik gemaak van haar goedhartigheid en haar waardevolle besittings en geld gesteel – en selfs vir Zeus saam met hom gevat! Die vriend is drie weke later aangekeer en Zeus is na KCHA gebring.”
Die organisasie het Facebook ingespan om vrywilligers te kry wat Zeus met sy gesin kon herenig – betyds vir Kersfees.
Zeus was te groot om te vlieg (hy weeg 33 kg), het Chelsea Staley van die KCHA, aan WOWK-nuusorganisasie gesê.
Die organisasie het finansiering, vervoervoorraad en brandstof bekom om Zeus met sy gesin te herenig. Vyftien verskillende persone het hand opgesteek om Zeus van Wes-Virginia na Montana te vervoer. Zeus het selfs by sommige vrywilligers oornag op pad terug huis toe.
Zeus het binne ses dae oor ses state heen gereis en het Dinsdagaand veilig by die huis aangekom.
Pragtige woef en storie en al die mense met goeie hart.