Skermgreep uit die video
Verskeie sportbyeenkomste, kunstefeeste, toergroepe en konferensies is gekanselleer weens die wêreldwye uitbreking van die koronavirus (Covid-19)-pandemie. Een van dié geleenthede wat gekanselleer is, is ʼn egpaar se bootreisvakansie.
Dave en Norma Trill van Australië het beplan om hul 53ste huweliksherdenking op ʼn 10 dag lange bootreis in die Stille Oseaan te vier. Toe hul vakansie egter gekanselleer is weens die uitbreking, het hul dogter vinnig planne gemaak om seker te maak haar ouers het nog steeds ʼn spesiale dag.
Jane Trill het ʼn video op Facebook gedeel waar haar ouers (albei 74 jaar oud), elk met ʼn glasie wyn in die hand en geklee in snoesige kamerjasse, voor ʼn televisie sit en na beeldmateriaal van die oseaan kyk.
Die video bied groot vermaak vir sosialemediagebruikers. “Dol daaroor, dit lyk baie ontspannend!” skryf een persoon in die kommentaar. “Ek hou baie hiervan – ons moet dit ook doen, ons Disney-vakansie is gekanselleer!” skryf ʼn ander. “Uitstekend! Geluk met jul huweliksherdenking, Norma en Dave!” laat nog ʼn persoon hoor.
Jane het gesê haar ouers het dit baie geniet. Op ʼn vraag of haar ouers nog “virtuele bestemmings” gaan besoek, het sy gesê: “Hulle was so verheug oor die aandag dat ons dink ons moet nóg ‘n video doen!”
Die nuwe koronavirus het verlede jaar in Wuhan, China uitgebreek. Inwoners is geïsoleer en gesondheidbeamptes het gepoog om die verspreiding van die virus hok te slaan. Die Wêreldgesondheidsorganisasie beveel aan dat persone hulself isoleer en seker maak dat jy nie naby aan iemand kom wat hoes of nies nie.
En moet net nie die toiletpapier vergeet nie…☺
‘n Australiese boer maak ook ‘n plan!
Dit lyk soos die ware Jakob.
Oulik.
Met “You Tube” reis ek die hele wêreld vol sonder n bekommernis van virusse rowers en die waarde van die Rand en iets wat ek nie mag sê nie………