Karen Woods (Foto: Karen Woods-webwerf)
Karen Woods (53) het haar eerste boek geskryf toe sy 39 jaar oud was – net ná sy ʼn geletterdheidskursus vir volwassenes voltooi het. Sy het nou reeds 27 boeke agter haar naam.
Woods, wat beskryf word as Manchester, Engeland se “Queen of Crime”, sê om te kan lees en skryf het haar lewe verander.
Sy het ʼn kontrak met uitgewer HarperNorth aangegaan en het al op verskeie TV-programme verskyn.
“Ek voel ek verteenwoordig dié mense wat ʼn slegte begin gehad het in hul lewens. Ek wil ʼn inspirasie wees vir vroue wat dink net omdat hulle kinders het, kan hulle nie doen wat hulle graag wil nie.”
Sy vertel haar ouers het geskei toe sy 13 jaar oud was. Sy het as 15-jarige die skool verlaat toe sy swanger geraak het. Die baba is egter op sewe maande doodgebore.
Die paartjie het nog drie kinders gehad en Karen was ʼn tuisblymamma totdat haar verhouding tot ʼn einde gekom het toe sy 27 jaar oud was en sy toe vinnig ʼn inkomste moes genereer.
Sy het nooit op skool geleer om te lees of skryf nie, want sy het gesukkel om te konsentreer en gereeld saam met ander leerders stokkies gedraai.
Sy het as ʼn skoonmaker gewerk en toe sy 39 jaar oud was, het sy ʼn bevordering gekry – sy sou egter e-posse moes skryf as deel van die werk. Sy het ʼn geletterdheidskursus vir volwassenes bygewoon en ná twee pogings het sy die toets geslaag om haar sertifikaat te ontvang.
Terwyl sy besig was met die kursus, het sy haar droom bekendgemaak dat sy graag eendag ʼn boek wil skryf – en net drie maande later, het sy haar eerste boek, Broken Youth, afgehandel.
Empire Publications, ʼn uitgewer gebaseer in Manchester, het in die boek belanggestel en daarna het sy nog 20 boeke uitgegee.
Uitgewers HarperNorth het haar laaste sewe boeke uitgegee.
Sy is ook ʼn ambassadeur vir Volwasse Leer en werk met kinders wat nie in hoofstroom-onderrig is nie.
“Ek wil vroue, ouer as 40, inspireer om hul drome na te jaag. Dit is nooit te laat nie.”
Bronne: Mirror, Daily Mail, Manchester Evening News
