Was dit nog altyd jou droom om ʼn skrywer te wees? Dan is Skryfnet se inleidende skryfkursus, Inleiding tot Kreatiewe Skryfkuns, die perfekte manier om jou droom vlerke te gee.
Hierdie praktiese, inleidende aanlyn kursus wat van 10 Oktober 2022 vir die vyfde keer aangebied word, is ontwikkel deur die bekroonde Afrikaanse skrywer prof. Hans du Plessis, en word aangebied deur Charlene Hougaard.
Inleiding tot Kreatiewe Skryfkuns duur agt weke en fokus op die skryf van verhalende prosa, met spesifieke verwysing na die skryf van ʼn kortverhaal. Die beginsels en skeppingselemente wat in die kursus bespreek word, geld egter ook vir die skep van enige verhalende prosawerk – soos ʼn roman, jeugverhaal, kinderverhaal of novelle.
Die kursus bestaan uit agt leergedeeltes (wat weekliks op kursusgangers se eie tyd deurgewerk word) met notas, video’s, praktiese opdragte, aanvullende leermateriaal en regstreekse aanlyn sessies.
Charlene, die aanbieder, ondersteun die deelnemers om die inhoud en vaardighede te bemeester en gee ook weekliks terugvoer oor werkstukke. Deelnemers kan ook enige tyd met mekaar gesels op die platform se kletskamer.
Na afloop van hierdie kursus sal deelnemers toegerus wees met die teoretiese kennis en praktiese vaardighede om ʼn eie verhaal te beplan, te skryf en te ontleed. Hulle sal ook kan spog met ʼn afgeronde kortverhaal en ʼn sertifikaat van Akademia.
Oor die kursusontwikkelaar en -aanbieder:
Prof. Hans du Plessis (Foto: Hans du Plessis/Facebook)
Die geliefde en bekroonde Afrikaanse skrywer prof. Hans du Plessis het in 1978 gedebuteer met sy digbundel Kleinwild. Sedertdien het hy meer as 160 publikasies – waaronder akademiese artikels en boeke, ses digbundels, drie jeugromans en vier romans – die lig laat sien. Sy jongste roman, Die opstand van Poppie Nel, het in 2020 by Lapa-Uitgewers verskyn. Du Plessis het al verskeie pryse en toekennings vir sy werk ontvang, onder meer die ATKV-kinderboekprys en ʼn erepenning van die Suid-Afrikaanse Akademie vir Wetenskap en Kuns.
Du Plessis is reeds sedert 1985 betrokke by skryfkurssuse wat die Afrikaanse Taal- en Kultuurvereeniging (ATKV) in samewerking met die Noordwes-Universiteit aanbied. Hy was ook die eerste direkteur toe die ATKV-skryfskool in 1990 gestig is. Hy en sy vrou, Magdaleen, woon op Potchefstroom.
Charlene Hougaard (foto verskaf)
Charlene Hougaard het haar uitgewersloopbaan in 1989 begin by Via Afrika, waar sy aanvanklik prosa en poësie in die Afrikatale uitgegee het. Met die implementering van Kurrikulum 2005 het sy gefokus op die uitgee van skoolhandboeke. Haar loopbaan by Lapa-Uitgewers het begin in 2005 in die algemene niefiksie-afdeling. Daarna het sy in die vrouefokus-afdeling, wat later deel geword het van die fiksie-afdeling, gewerk. In 2019 het sy besluit om ʼn vryskuttaalpraktisyn te word en het sy haar toegespits op die redigering van manuskripte asook manuskripontwikkeling. Sy help ook sedert 2006 met die aanbieding van die ATKV Skryfskool vir liefdesverhale (Lenteskool) en het ook al by die Herfsskool opgetree.
Bespreek nou jou plek!
Belangstellendes kan nou uit een van twee opwindende opsies kies wanneer hulle plek bespreek vir hierdie waardevolle kursus.
- Betaal ’n eenmalige bedrag van R2 800 vir die kursus van agt weke. Klik hier om jou plek te bespreek.
- Bespreek vir Inleiding tot Kreatiewe Skryfkuns + enige ander kursus van jou keuse (binne 12 maande vanaf betaling) en kry R500 afslag. Dis twee kursusse vir slegs R4 450! Klik hier om van die spesiale aanbod gebruik te maak.
Besoek ook Skryfnet se webblad vir meer inligting en antwoorde op gereelde vrae.
Skryfnet is ’n projek deur Maroela Media en Akademia.
