Om ’n boer te wees

plaas-verwoes-01

Foto: Verskaf.

Alta Pretorius, AfriForum se streekskoördineerder van Stellaland, skryf:

Ek is ’n boerkind. Gebore en getoë. Ek weet hoeveel harde werk dit verg om kos te produseer. Geloof. Volharding. Soveel meer vandag, met so baie faktore wat teen die boer is.

Vandag het ek gesien hoe lyk moedeloos. Desperaat. Hooploos.

’n Boer wie se grond aan ’n voormalige sendingstasie grens, soek hulp. Die sendingstasie is verruil en is nou ’n informele nedersetting met HOP-huise en plakkershutte. Daar is nie werk vir die mense wat daar bly nie, dus is die meerderheid van die inwoners werkloos. Hulle besit nie grond nie, maar sommige wel vee.

Hierdie boer besit so 900 ha-grond teen die ou sendingstasie. Hy het dit nie gesteel nie. Sy pa het hard gewerk om dit te koop en aan hom nagelaat. Hy is trots daarop. Hy ken die plaas. Hy is lief vir die plaas.

Die familie hét die veeplaas toegerus met goeie drade, pompe, damme en suipings. Ongelukkig moet ek verlede tyd gebruik.

Die nuwe bure voel en sê dat die grond aan hulle behoort. Hulle vee móét daar wei. Politiek? Die drade is in die pad, dus is dit afgebreek. ’n Pomp wat jy “verniet” kry, is ’n paar rand werd. Dis nie belangrik dat diere water moet hê nie. In geen dam of krip is nou ’n druppel water nie.

Die wettige eienaar is moedeloos. Hy het al bykans ’n halfmiljoen rand verloor aan skade. Vandalisme. Hy kan nie sy vee meer daar laat wei nie. Tensy hy hulle nie meer wil hê nie. Hy is op breekpunt. Ek dink ek verstaan. Selfs die polisie is onwillig om te help. Hy voel niemand gee om nie. Hy sukkel nog om die gevolge van die droogte te verwerk. Daar is nie geld oor vir skade ly nie.

Ek wil hom bemoedig, maar dis moeilik. Sy noodroep het by ons uitgekom. Ons wil graag help. Ek verstaan sy hulproep, maar ek het nie ’n plaas nie. Verstaan ek regtig?

Op pad terug van die plaas af besef ek: Hierdie is nie soos die Hemelse Vader dit wil hê nie. Hy is ’n God van orde en hierdie is nie orde nie. Dis wanorde. Dis nie hoe dit hoort nie.

My besluit is duidelik: As ek ’n Christen is, móét ek hierdie ongeregtigheid met alle mag beveg. Ek weet nie of ons sukses sal behaal nie, maar gelukkig het ek ’n bevoegde span agter my.

Ek het die boer probeer bemoedig en gemaan om nie impulsief op te tree nie. Ek voel self bietjie kriewelrig om op die plaas rond te stap. Ek weet ek verstaan nie mooi hoe hy voel nie. Ek neem ’n besluit: Vir jou, vir die omgewing, vir ons land en volk, maar boweal, vir God sal ek hierdie stryd stry.

Ek wil op my medeburgers en -geloofsgenote ’n beroep doen: Los kleinlike verskille. Staan saam teen ongeregtigheid. Moenie vra wie dit gaan doen nie. Slaan jou hand aan die ploeg. Staan saam en wees die verskil.

Totius se beryming van Psalm 138: 4 kom in my gedagtes op en ek weet: Ons dien ’n almagtige God!

“As in my angs en teëspoed
Die krag en moed my wil begewe.
As vyande van veglus brand
Dan keer u hand en red my lewe.
Die HEER is goed en wondersterk
Hy sal sy werk deur niks laat keer nie.
Laat my o Heer wat my bewaar
Tog nou nie vaar en nimmermeer nie.”

Hierdie rubriek is ʼn lesersbrief wat op Maroela Media se webwerf gepubliseer is. Die menings en standpunte wat in hierdie skrywe uitgespreek word, is nie noodwendig die beleid of standpunt van Maroela Media se redakteurs, direksie of aandeelhouers nie. -Red

Deel van: Só sê die lesers

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

22 Kommentare

Julie Jansen van Rensburg ·

Miskien sal sommige mense my verkeerd opneem, maar ek is net dankbaar dat my ouers – wat baie jare lank in die Ermelo distrik geboer het – reeds lankal nie meer lewe nie, want ek vrees dat sou hulle vandag nog geleef het, sou hull ook baie moontlik slagoffers van ‘n wrede plaasaanval kon gewees het. Hier in die vroeë jare was daar wedersydse respek tussen wit en swart; daar was drie Swazi gesinne wat op die plaas gewoon en gewerk het, maar dit was so vreedsaam dat deure en vensters in die warm somernagte wydoop gestaan het, en AS een van die werkers dalk in die nag aan my ouers se kamervenster geklop het, was dit om hulp te vra vir siekte of ongeluk – maar sprake van aanvalle soos vandag het eenvoudig nie bestaan nie… my speelmaats was almal swart kinders en ons het geweet dat as ons stout was, het die platriem “kos” gekry, andersins het ons ook soms ‘n snoeperytjie uit Ma se spens gekry… maar nou – “WEEN, DIE GELIEFDE LAND…” Ek wonder wat van my maats, Sophie, Violet en “Dai-dai” geword het – leef hulle nog??? Wens ek kon iewers uitvind…

Schalk ·

Hoe antwoord mens iemand se moedeloosheid. wat erg klink is dikwels veel erger vir iemand wat direk betrokke is by die situasie. Dit is nie reg nie. Die situasie regverdig optrede en vanoggend lees ek die artikel. Wil jy bouer of breker wees? Duidelik uit die artikel klasifiseer dit jou optrede , jou houding en bowenal jou persoonlikheid. Positief of negatief? Maar reg is reg en verkeerd bly verkeerd altyd. Elke mens weet ongeag sy opvoeding wat reg en verkeerd is. Trots om op te staan en verkeerd te beveg bestaan al minder want die negatiewe element word sterker. Dit is makliker om te neem as te werk vir besittings en ‘n lewe te skep. Te voer as om te kry is die harde boer se keuse en hy dra by. Die mense wat net wil vat en kry moet besef daar gaan ‘n eiende kom aan die bronne van voortbestaan. Ek bid vir die droogte se breek en almal ras en geslag word voor saam gebid dat ons verstaan. Die gemeenskap leiers moet tog besef dat wanorde hulle gaan vernietig of is kortstondige heldeverering genoeg om van te leef? Ek kry seer as ek sien hoe word ons mense wat boer benadeel terwyl die goedheid om te help misbruik en geknak word. Die Polisie is self deel van die verval. Hulle eed om te beskerm net ‘n bluf.

Jerry ·

Dit is hard, maar lekker om te boer, want jy pluk die vrugte van jou arbeid. Wanneer daar egter n tyd aanbreek dat dit nie meer lekker is nie agv watse redes ookal, dan beteken dit dat gesonde verstand ingespan moet word vir keuses wat gemaak moet word. Indien jy die keuses wat gemaak moet word, uitstel en uitstel beland jy in n situasie waar jy later geen keuse meer kan maak, behalwe om dieper weg te sak in jou nou reeds vasgevalle situasie. Die boer oor wie Alta nou skryf, bevind homself nou in daardie vasgevalle situasie, dieselfde situasie waarin soveel Zimbabwiese boere hulself ook uiteindelik bevind het. Hulle het ook toe hulle n keuse moes maak, dit aanhou uitstel. Afriforum dink hulle verstaan die situasie en dat hulle hulp die situasie gaan verander en dit weer lekker maak om te boer. Dit gaan vir die onmiddellike, maar daarna oor medium en langtermyn gaan dit die situasie net vererger. Polities gesproke sal intimidasie in al sy verskuilde vorme toegepas word teen die boer deur besetting, wetgewing, wetstoepassing, vervolging of n versuim daarvan en dit sal aanhou totdat die boer se gees uiteindelik knak. Daar is n verskil tussen sterk te staan in geloof en om blatantweg boosheid uit te tart! As jy boosheid nie verstaan nie, hoe de dinges roem jy daarop dat jy geloof verstaan!

Kobus ·

Inderdaad. Om terug te verlang na die “goeie ou dae” op ‘n rustige plaas gaan nie werk nie. Die situasie het verander en dit gaan erger word. Ander planne moet gemaak word.

Risko ·

Ek het simpatie met ons boere maar glo my, almal van ons het nie regtig ‘n heenkome nie. As 50 jarige moet ek nou alles verkoop om in ‘n ander land oor te begin. Dit is nie net mense op plase wat vermoor word nie, my buurvrou, my oom, my vriend se seun, almal vermoor. Die land sal nooit weer ekonomies meëding nie, ons politikuste is pateties en het geen vermoëns om ons deur die drif te trek te kry nie.

Adri ·

As jy wil boer en jy wil op jou plaas woon dan moet jy jou beste poging aanwend om nie deel van die statistieke te word nie. kyk krities na jou beveiligingstelsel en handel dienooreenkomstig. Hoeveel honde het jy? Moet jy iewers stilhou om ‘n hek oop te maak? Het jy alarms wat werk? So baie boere word vermoor omdat hulle geglo het dit gebeur net met ander.

Adri ·

Ek glo dat ons onderhandelaars voor oorgawe , het nie die opponent geken nie. Nie een van die politici was boere nie en wie sou hulle geleer het hoe werk die ANC se koppe. Afrika se leiers se manier van lei is om jou opposisie uit die land te verjaag af Suide toe en dan heers hulle eendag in weelde in ‘n land met relatief min inwoners. Daar is net twee plekke waarheen die massas nou verder kan Suid vlug en dit is Robbeneiland en Antartika.

Willie Coetzee ·

Dit wat is Suid Afrika gebeur het en wat tans aan die gebeur is, is baie jare gelede al voorspel. Die aanslag van die bose magte op die ‘volk van God’. Die enigste uitweg is verootmoediging deur die ‘volk van God’ tot die Die Enige God. Moeilike tye wag op ons in die land maar, die uitkoms sal kom. Ons is die enigste volk in die wêreld wat ‘n gelofte aan die Almagtige God gemaak het en dit is tyd om dit gestand te doen.

Kallie ·

SA is lankal nie meer ‘n land vir wit mense nie. Hier woon 55 miljoen swartmense wat nie die gelofte afgelê het nie, maar tog is hulle in beheer van die land. Wat nou nodig is is ‘n nuwe gelofte waar gebid word vir vrede en veiligheid.

DeVill ·

Miskien moet ons by mekaar kom, so 500-1000 van ons, en daar teen die draad gaan kamp vir so week of twee om die grens te beskerm teen hierdie boewe.

Ben ·

Ek sit met n baie soortgelyke probleem in Steynsrus distrik.
Die persoon laat sy beete net wei en maak nie saak hoeveel geld gespandeer word om drade reg te maak nie, die man se beeste loop oor 5 plase, en die polisie doen niks. Baie sake is aanhangig gemaak maar niks kom daar van nie…..

Gerrit ·

Ek het raad vir daai boer. Maar dan moet ek dit vir hom persoonlik gee, nie op n openbare forum nie. My raad behels onwettige optrede, eintlik blatante kriminele optrede. Bitter min boere sal waarskynlik so laag daal om na my raad te luister, maar op die stadium dink ek dis al wat sal werk.

DeVill ·

Mag ons nooit so laag daal soos hierdie mense nie, ons is beter as dit!!

Maria ·

My hart net so stukkend vir ons lieflik land en boere wat so hard werk en my gebede sal aan alle boere uitreik ….hou moed en houvas wat julle voorouers gewerk het …wees sterk soos Psalm gedig.

Spike ·

Adri, ons het ons opponent geken, maar ons probleem is ons is goedgelowig, vertrou te maklik en wil graag die goeie in ander raaksien. In afrika werk dit nie so nie.

Jimmy ·

Heeltemal reg. In Afrika oorwin en oorleef net die sterkste.

Boer van Uniondale ·

Baie dankie Alta Pretorius vir hierdie skrywe wat ontstellend begin maar jou slot gedeelte is bemoedigend en moreel en Geloofs versterkend.
Ek glo vas dat Die Here in wie ons Glo, vir Organisasies soos Solidariteit en AfriForum gebruik as Instrumente in Sy Raadsplan.

Sam ·

Willie Coetzee, jy praat die waarheid. Ek verstaan jou hart en ken ook jou God.

Hier is baie sinvolle kommentaar. Is dit net ek, of kom jul ook agter dat vele harte draai en oë oopgaan vir die waarheid. Dis verblydend, want uitkoms sal daar nie wees tot elkeen wat moet, sal sien nie en elkeen wat moet, sal buig in erkentenis boor ons Skepper nie.

Danie ·

Meskien kan die boer, sy besigheids hoed op sit en met die opperhoof van die groep gaan gesels. Ek is seker daarvan as hy van die grond vir hulle leen vir hulle vee en hy hulle help om reg te boer hulle tot n besigheids besluit kan kom. Dit mag dalk werk en vir almal voordeelig wees.

Gert ·

Mens onderhandel nooit met afpersers nie, want as jy dit doen sit jy die volgende dag met 10 keer meer van hulle.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.