Deur Frank Karsten
(Foto: iStock)
ʼn Komediant het een maal gespot: “99% van prokureurs gee die res ʼn slegte naam”. Dieselfde geld vir kriptogeldeenhede.
Elke keer as ʼn ander kriptofirma of kriptomuntstuk skouspelagtig van die krans afval, soos FTX, TerraUSD en Luna in 2022, weerspieël dit verkeerdelik sleg op Bitcoin.
Die kripto-wêreld word dikwels as ʼn casino gesien, en grotendeels is dit korrek. Met die hoop op vinnige winste koop mense hoogs gewaardeerde nuwe munte sonder om voldoende kennis te vergader of sekerhede in te bou.
Sedert Bitcoin se ontstaan in 2009, word beraam dat meer as 5 000 alternatiewe kriptogeldeenhede, sogenaamde “altcoins”, ontstaan het – elk met sy eie spesiale kenmerke wat dit beter as Bitcoin sou moes maak.
Hulle is begin deur kommersiële maatskappye, swendelaars, slenters en goedbedoelde weldoeners. Baie kriptomunte is geskep deur mense wat hul eie sakke vinnig wou vul in die nasleep van Bitcoin, die eerste suksesvolle kriptomunt.
Die probleem met 99% van daardie altcoins is dat hulle, anders as Bitcoin, gesentraliseer is en dus kwesbaar is vir bedrog, sabotasie en mislukkings.
Ook agter Ethereum, die nommer twee in kriptoland, sit maatskappye en stigtings met kantore en ontwikkelingspanne. Met die hulp van beleggers is die muntstuk in 2014 deur onder meer Vitalik Buterin en Joseph Lubin bekendgestel. Albei het skatryk geword omdat hulle baie munte vir hulself gereserveer het voor hulle munte vir openbare verkoop beskikbaar gestel het.
Die altcoiners skree dikwels dat hulle gedesentraliseer is, maar in werklikheid blyk hulle sogenaamde DINO’s (Decentralized In Name Only) te wees. Die hele idee agter Bitcoin is desentralisasie, want sonder desentralisasie is daar geen betroubaarheid of sekuriteit nie. As ʼn kriptogeldeenheid té gesentraliseer is, skep dit ʼn enkele punt van mislukking. ʼn Klein groepie mense kan dan transaksies blokkeer of hulself verryk deur ekstra munte uit te gee.
Regerings kan ook eenvoudig die kriptogeldeenheid nekomdraai deur maatskappye te vervolg of mense toe te sluit. Maar niemand kan Bitcoin dagvaar nie, want daar is hoegenaamd geen kantoor, posadres of leier nie. Dit sal wees soos om e-pos hof toe te neem. Wel, baie geluk!
Een van die geloofsbelydenisse van die Bitcoin-aanhangers is “in kode sal ons vertrou”. Bitcoiners glo dat ons nie ons vertroue moet plaas in mense wat hul vingers op die geldpers het of wat ons geld bestuur nie. Daarom verkies hulle om op Bitcoin se verspreide rekenaarkode staat te maak om te verseker dat munte nie sommer net geskep of sluipweg gesteel word nie.
Dit is maklik om ʼn nuwe kriptogeldeenheid te skep, maar om dit te desentraliseer het bewys skrikwekkend moeilik te wees, selfs al is dit jou doel. Dit is baie moeilik om voldoende gebruikers en geografiese verspreiding te verseker. Jy moet ook verhoed dat sekere groepe, soos sagteware-ontwikkelaars of sogenaamde Bitcoin-myners, te magtig word en die geldeenheid korrupteer.
Bitcoins kan beskou word as ʼn kommoditeit, soos goud of graan, en nie as ʼn finansiële produk soos ʼn aandeel of verband nie. Hulle word immers nie sentraal uitgereik deur ʼn maatskappy of belanghebbende met ʼn winsmotief nie.
Selfs Gary Gensler, die hoof van die SEC, die Amerikaanse finansiële markte-waghond, erken dat Bitcoin in ʼn spesiale posisie is. In 2022 het hy gesê: “Sommige kriptogeldeenhede, soos Bitcoin, en dit is die enigste een wat ek gaan noem… is kommoditeite”.
Gensler het ook aangedui dat byna alle ander kriptomunte soos ʼn aandeel of verband lyk, terwyl hulle nie amptelik geregistreer is nie. Dit hou hulle ʼn groot risiko om deur die SEC gereguleer te word of selfs vervolg te word.
Van al die duisende kriptogeldeenhede het net Bitcoin tot dusver daarin geslaag om gedesentraliseer, veilig, neutraal en stabiel te word en te bly. Diegene wat die belangrikheid van desentralisasie verstaan, moet meer waardering vir Bitcoin kry na elke altcoin-ongeluk, nie minder nie. 99% van alle altcoins gee die res ʼn beter naam!
- Frank Karsten is die skrywer van The Discrimination Myth (discriminationmyth.com) en mede-outeur van The Democracy Beyond (beyonddemocracy.net).
Die toekoms van Bitcoin en die rol wat dit sal speel in die wêreld van finansies en ekonomie is onseker en deels afhanklik van faktore soos regulering, tegnologiese vooruitgang, aanvaarding, en ekonomiese behoeftes. Sommige mense beskou Bitcoin as ‘n potensiële hoërisiko-belegging of as ‘n toekomstige geldeenheid, terwyl ander dit dalk meer sien as ‘n digitale kommoditeit. Die antwoord of Bitcoin die geld van die toekoms gaan wees, hang af van ‘n wye verskeidenheid faktore en kan uiteindelik slegs deur die verloop van tyd en gebeure bepaal word.
Geen geld eenheid wat nie gerugsteun word deur werklike waarde, beteken iets nie. Nie die R, nie bitcoin. Alles is digitaal. Alles vraag en aanbod.
Wat gee waarde aan goud (of watookal jy bedoel met werklike waarde)?
Solank Bitcoin die geldeenheid van keuse vir cyber misdaad bly kan dit nie vertrou word nie. Ransom word altyd in Bitcoin geeis omdat dit verskuil is.