Pres. Cyril Ramaphosa (Foto: Twitter)
Mnr. President
Ons het met ongeloof kennis geneem van die opmerkings wat u gemaak het tydens die slotopmerkings van die 26ste Nasionale Konferensie van die ANC-jeugliga op 2 Julie 2023, waarin u jong Suid-Afrikaanse burgers aanspoor om militante rewolusionêre te word.
Dit het ons ʼn ruk geneem om op ʼn beskaafde reaksie te besluit. Vir ons, ons lede en ondersteuners, en die meeste Suid-Afrikaanse burgers, is so ʼn verklaring absoluut onverantwoordelik. As die president van ʼn land behoort u beter te weet as om geweld aan te moedig vanaf ʼn openbare verhoog. Maar aangesien u die opmerkings gemaak het, verstaan u klaarblyklik nie waarom dit as opruiend beskou sou word nie.
TLU SA verteenwoordig kommersiële boere in Suid-Afrika. Ons lede is kwesbaar vir gewelddadige aanvalle deur misdadigers op hul plase en in hulle huise. Misdaad is inderdaad buite beheer – ʼn groot klad op u regering se doeltreffendheid – regoor die land, maar die aanvalle op boere is dikwels meer gewelddadig en sinneloos. Boere, hul gesinne en werkers wat aanvalle oorleef het, rapporteer dat aanvalle toeneem nadat politieke leiers opruiende stellings maak. Hierdie aanvalle is dikwels nie daarop gemik om besittings, geld of plaastoerusting te steel nie, maar met die primêre doel om te beseer en/ of te dood. Hulle wil óf wraak neem óf ʼn vyand uitskakel.
Boere is egter nie die vyand nie. U regering is die ware vyand van alle landsburgers. In die dertig jaar waarin die ANC gepoog het om die land te lei, het ons gesien hoe korrupsie en bedrog toeneem. Ons infrastruktuur stort ineen. Ons staatsentiteite misluk. Misdaad is buite beheer. Werkloosheid styg kwartaal na kwartaal. Kinders in graad vier kan nie lees nie en benodig slegs 30% om matriek te slaag. Ons ekonomie is so swak dat maatskappye nie hier wil belê nie. Ons kan voortgaan om al u mislukkings op te noem, maar as die president van die land behoort u volkome bewus te wees van die rampspoedige toestand van Suid-Afrika.
Die land funksioneer slegs as gevolg van die privaatsektor, insluitend boere, en hul planne om dit aan die gang te hou, ten spyte van u regering se tallose pogings om dit moeiliker te maak om as ʼn besigheid te oorleef.
Vir ʼn redelike persoon sou dit vanselfsprekend wees waarom ons lede ontsteld sou raak wanneer u militante optrede aanmoedig – terwyl ons alles in ons vermoë doen om kos op die tafels van alle Suid-Afrikaanse burgers te hou.
Ons sal geen militante optrede onderneem nie. Ons sal ons kinders nie leer om rewolusionêre optrede te neem nie.
Ons sal voortgaan om hard te werk en te verdien waarvoor ons werk. Ons sal voortgaan om ons kinders te leer om na hulleself om te sien en nie aanspraak te maak op voorregte nie.
Ons sal voortgaan om planne te maak om te oorleef. Ons sal voortgaan om ons kinders te leer om innoverend te wees.
Ons vra dat u ook oorweeg en besin oor wat u jongmense leer.
Met vriendelike groete,
Bennie van Zyl
Hoofbestuurder: TLU SA
Amen, ons sal voortgaan Met God se hulp soos die laaste 400 jaar.
Doen julle werk en bly op die agtergrond. Moenie te veel verwag nie. Beskerm julself. Dan sal dit redelik goed gaan.
Die anc jeug moet maar gaan vir goud. “Live by the sword , die by the sword. “
Ja, vereker sal ons doen wat reg is, Maar, meneer, dink jy nie dat jou vyande met die hulp van die veragtelike russe jou einde beplan nie?
Bennie die ANC lees geen briewe nie en sal net aandag skenk as die probleem in die publieke oog kom. Ons is regtig net te ordentlik met al die u’se.
Hulle sal ons nie onderkry nie! Hoe meer hulle ons vervolg en onderdruk, hoe sterker word ons.