Weste moet optrede van Saoedi’s in Jemen veroordeel

Jemeense seuns stap deur die puin van ʼn huis wat vernietig is tydens lugaanvalle van die Saoedi-gesteunde koalisie in Sanaa, Jemenin Augustus 2016. Foto: Xinhua/Hani Ali/wire.africannewsagency.com

Sedert die oorlog in Jemen op 19 Maart 2015 begin het, is reeds meer as 10 000 mense in hierdie konflik dood. Selfs erger as die duisende sterftes is die meer as 240 000 mense in Jemen wat tans weens die oorlog aan hongersnood ly en die miljoene meer wat reeds voedseltekorte ervaar en wat moontlik ook binnekort deel van die ergste hongersnood tans in die wêreld sal wees. ’n Hele generasie burgers van Jemen se lewens is reeds deur die oorlog verwoes.

Jemen is ’n baie verdeelde land met byna die helfte van die bevolking wat Soenniete Moslems is en die ander helfte Sjiïete. Die Soenniete woon hoofsaaklik in die suide van die land en die Sjiïete in die noorde. Voor hereniging in 1990 was Noord-Jemen en Suid-Jemen vir honderde jare geskei. Die huidige oorlog spruit uit die Jemen Revolusie van 2011 tot 2012 wat die regering van Ali Abdullah Saleh, ’n Sjiïete Moslem, uit die kussings gelig het. Saleh is opgevolg deur Abd Rabbuh Mansur Al-Hadi, ’n Soenniet en Al-Hadi se regering het weer tot ’n opstand onder die Sjiïete Houthi’s aanleiding gegee.

Toe die Houthi-rebelle groot dele van die noorde van Jemen in 2015 beset het, het Soenniete-lande soos Saoedi-Arabië en die Verenigde Arabiese Emirate, ingegryp en oorlog teen die Houthi’s verklaar. Die Houthi’s word tot ’n beperkte mate deur Iran ondersteun.

Hoewel sektariese verskille ’n definitiewe rol in die konflik in Jemen speel, speel ander faktore ook ’n belangrike rol. Dit sluit in die magstryd in die Midde-Ooste en Westerse bondgenootskappe. Dit is veral die Verenigde State van Amerika se blinde ondersteuning aan Saoedi-Arabië se aanvalle wat toenemend onverstaanbaar is en wat oor die afgelope dae deur die leierskap van vyf groot humanitêre organisasies veroordeel is. Oor die afgelope paar dae het daar ook vir die eerste keer ’n meer gekoördineerde en ernstige protesstem in die Amerikaanse kongres teen Amerika se ondersteuning vir Saoedi-Arabië se optrede in Jemen, na vore gekom.

Gedurende dieselfde week wat George H.W. Bush begrawe is, het ernstige vrae oor Amerika se internasionale beleid begin ontstaan. Bush word onthou vir sy verstandige en versigtige hantering van ingewikkelde internasionale krisisse soos die einde van die Koue Oorlog en Irak se inval in Koeweit. Na Bush se vertrek in 1992 het Amerika onder leiding van Bill Clinton, George W. Bush, Barack Obama en ook Donald Trump toenemend meer aggressief en intervensionisties begin optree en is gevaarlike bondgenootskappe versterk in plaas van heroorweeg. Een so ’n bondgenootskap is dié met Saoedi-Arabië.

Die fout wat die Amerikaners maak, is om te dink dat lande soos Saoedi-Arabië en die Verenigde Arabiese Emirate goeie en getroue vriende is wat altyd in Amerika se belang sal optree. Verder word Amerikaanse optrede gedikteer deur die persepsie dat Iran boos en gevaarlik is en by elke konflik in die Midde-Ooste betrokke is. Beide hierdie persepsies is verkeerd.

Dit is hoogtyd dat Amerika en ander Westerse lande hard en duidelik die optrede van Saoedi-Arabië in Jemen veroordeel.

  • Hierdie nuuskommentaar word deur Pretoria FM verskaf. Luister daagliks na Klankkoerant op Pretoria FM vir die jongste nuuskommentaar.

Hierdie plasing is deur ʼn onafhanklike persoon of onderneming saamgestel. Die menings en standpunte wat in hierdie skrywe uitgespreek word, is nie noodwendig die beleid of standpunt van Maroela Media se redakteurs, direksie of aandeelhouers nie. –Red

Jaco Kleynhans

Meer oor die skrywer: Jaco Kleynhans

Jaco Kleynhans is hoof van internasionale skakeling vir die Solidariteit Beweging.

Deel van: Meningsvormers

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

8 Kommentare

jongste oudste gewildste
Herman Goosen

Ja, as dit nou maar so eenvoudig was. Dan was daar nooit ies soos derde wereld lande nie. Die problem is dat die Saudis geld het en is boonop nog een van die min bondgenote van die Weste in die Midde Ooste. Dus verwag ek dat die Weste sal paai en onderhandel in die agtergrond, maar nie openlik hul optrede ver sal veroordeel nie. Alles gaan oor politiese korrektheid en nie wie reg of verkeerd is nie

Gerhard

Nog iets wat moet gebeur is dat anti-VSA, anti-Trump en anti-Weste kommentators begin om meer eweredig kommentaar te lewer eerder as om behep met die VSA, Trump en die Weste te wees en vir ‘n slag kritiek lewer op die gedrag van Rusland wat gerus uit Die Oekraïners en ander buurstate se sake kan bly.

Ronnie

Geen land wat wapens aan die midde ooste verkoop kan verskoon word nie. Dit is skreiend wat in Jemen gebeur. Daar was berigte van betroubare bronne, wat daarop dui dat wapens wat bv kinders op ‘n bus gedood en gewond het, van die VSA en VK afkomstig is. Geen hoeveelheid geld en werksgeleenthede kan dit regverdig nie. Die VSA en die Weste het bloed aan hulle hande vir hulle aandeel. SA ingesluit. As leier van die vrye wêreld rus ‘n groot verantwoordelikheid op Trump se skouers in hierdie opsig. Maar elke keer as hy sy mond hieroor oopmaak raak die… Lees meer »

Johan

Die skrywer se uitspraak dat Amerika sy steun aan Saudi Arabië moet heroorweeg word geensins in sy skryfstuk gemotifeer nie – inteendeel, dit spreek van ‘n oppervlakkige insig oor ‘n uiters komplekse situasie

Herman

As Ameika nie aan die Saudis gaan wapens verkoop nie, gaan iemand anders. Amerika kan nie vir die oorlog in Yemen verantwoordelik wees nie.
Elke land is verantwoordelik vir homself, netso ons hier in Suid Afrika.